暖男爸爸．专访︱郑中基指港剧不死惜现实局限创作：好多自我审查
认真问，你有多少年没看过港剧？
你又能否准确说出，现时周一至周五晚于81台（翡翠台）和99台（ViuTV）播出的自制剧有哪些？
如果有得拣，很多读者也情愿开Netflix看美剧《后翼弃兵》（The Queen's Gambit）或者韩剧《Start-Up：我的新创时代》吧，听讲深宵播放的日本BL剧《如果30岁还是处男，似乎就能成为魔法师》（简称《魔法处男》）或者泰国BL剧《I Told Sunset About You》也追得过，又有很多人话陆剧《燕云台》有唐嫣窦骁佘诗曼，阵容也挺吸引；若然尚有时间，可以追回《艾蜜莉在巴黎》（Emily in Paris）、《想见你》、《机动搜查队404》（MIU404）、《因为我们天生一对》（2gether: The Series）、《爱的迫降》……一日只得24小时，讲来讲去，说广东话对白的港剧总是无法成为大首选！
承认吧，港剧已吊盐水多时，不知多少次听到行内人叹气，面对市场规模限制和全球激烈竞争，今时今日的港剧真的“走投无路”：无线唔争气，拍嚟拍去都系𠮶啲题材，ViuTV系创新，但“笔直”太少。
郑中基（Ronald）已18年没有在港剧担正，撇开《东方华尔街》（2018）不说，张可颐（Maggie）也有数年了，因为一套《暖男爸爸》，令他们继《缘份无边界》（2000）之后，20年来再度聚头，开拍消息一出，香港观众已万分期待，斋睇牌面，叫座力比《二月廿九》强劲十倍。他们为何答允参演？下文会详细解释，反而最想问、最需要问的是：面对眼前窘境，身为演员到底怎样看？无线视后断言：“港剧唔会冇，问题系参差！”换句话讲，七孔流血还七孔流血，死还死，在旁的郑中基也认同港剧不会死，然而要重拾昔日辉煌，难矣。“而家我哋谂到嘅，好多时未必拍到，唔系拍唔到，系唔拍得，好多去咗自我审查。”你我皆知，这是铁一般的事实，但几乎没有人如“暴龙哥”那样够胆，将这句话放在台面说出口，听罢，先震惊，后悲哀，再不由自主地鼻子一酸。
撰文：游大东
协力：邱爱霖
录影：叶志明
剪接：陈尚欣
郑中基服装提供：HARRISON WONG
化妆：Mon Chun @monzichunmakeup（郑中基）、Gary Chung（张可颐）
发型：Horace @hairplay_hk（郑中基）、TEDDY NG @ 4seasons Hotel QG PRIVATE-I Salon（张可颐）
场地提供：富卫1881公馆
距离结束尚有大概五分钟时间，我很想问郑中基和张可颐：港剧畀人踩咗咁多年，到底仲有冇得做？
郑中基想了几秒，然后皱眉，看其表情都知道，他有点不知从何说起，“点讲呢？”
“唔会冇，港剧唔会冇，我觉得……”突然张可颐开口回应，两个人的声音重叠，郑中基决定先让对方解释。
“个问题喺参差𠮶度。”张可颐一脸认真的说，这是入行廿多年、拍过几十套剧的经验之谈。“你遇到个剧组，啲人全部都系一个Tone（目标一致），系真系做𠮶样嘢嘅，我遇过有。一入到剧组里面，（啲嘢）散修修嘅，我都遇过。”简单而言，能否遇到一套出色作品，既看实力，更看际遇。“睇下你入到去边度（剧组）啫，大陆都系一样㗎，你话内地嘅剧系唔系劲好多？都系参差，讲完喇，你遇到好嘅剧组，就会拍到好嘅嘢，唔好嘅，亦都有，香港？The same！”
对于张可颐的观点，郑中基相当认同。“其实你讲得好好，简单、直接、清楚！”但“暴龙哥”有更精辟的见解，直中问题核心，他说出来的时候，四周相当安静，但威力极大。“我觉得香港冇咗好自由嘅创作空间！”张可颐随即反问：“有咩？你觉得系呀？”郑中基用自身经历作例，他说以前拍喜剧，想到得就拍得到，现在想得到，但拍不得。“其实而家好多嘢（创作）都系有规限，喺呢个框框度，最好唔好涉及到‘有啲事’啦，我可以畀一个好简单嘅例子，你就知（现在）𠮶条线去到边喇。”
暖男爸爸︱郑中基开便利店被指𢯎赞助 灵感来自监制台湾亲身经历
曾于幕前“露械” 郑中基：而家唔拍得喇！
时间回到17年前，由谷德昭执导的《龙咁威2003》上映，其中一幕讲到郑中基饰演的“9527”在执勤期间，为了转移贼人目光，需要公然“露械”，好让邓丽欣饰演的拍档“1312”成功救走人质，“当时拍我打格仔除裤，冇问题，2014年，即系11年后，再拍番打格仔除裤，唔得喇，被人Ban咗。”点解唔得？“因为意识不良！”没有办法解决？“有，剪咗佢啰！”“暴龙哥”没有说这件事发生在哪一套电影里，我好奇，专诚翻查资料，发现他有份参演，而在2014年至2015年间上映的电影共有10套，分别为《六福喜事》、《金鸡SSS》、《大话天仙》（2010年制作）、《整容日记》、《四大名捕大结局》、《第七谎言》、《奇缘灰姑娘》、《天师斗僵尸》、《猛龙特囧》以及《全力扣杀》，但其实问题不在哪一部戏，而在行内人意识上的根本转变。
他继续说：“点解以前做到嘅嘢，而家用另一个方法再做，即系𠮶个Outcome系一样，都系打格仔，当然系用另一个方法变到冇咗条裤啦，但系唔得。”“唔得”两个字，就是红线，无色无味无嗅无形，几时可以，几时不可以？没有一套标准答案，正因为“冇得估”，专责创作的人和大老板就会不想挑战底线，“好多去咗自我审查，所以（对于）好多创作嘅人，系冇得畀佢哋进步，因为创作就系天马行空，但而家佢哋嘅‘天马行空’系规范咗喺个格仔入面，你喺入面点谂都得，但你唔好走出去，所以佢哋叻极，都系喺呢个范围，入面所有嘢都控制晒，冇嘢可以难到佢哋。”难怪面对“老大哥”美剧，和过去10年急速崛起的韩剧，港剧完全跑输大市，不止制作经常限米煮限饭，创作方面同样“揸颈就命”。
港剧落后有因 创作上自我审查屡见不鲜
“有啲人比较，话点解美剧可以咁样，点解你哋拍港剧就唔可以咁，第一就系创作问题，又睇睇韩国，点解韩剧咁成功？因为佢哋有政府资助，各方面都会Back up佢哋，譬如创作，谂到咩就做到㗎喇，唔会话惊……”张可颐连忙补充：“被检控、被审检！”之后郑中基接力：“系喇，费事麻烦，唔好博喇，所以啲嘢，咪永远走嚟走去都走唔出呢个框框。”所以张可颐笑指，今天唯有天才，方能够制作超越前人的港剧，“一系你谂啲高招嘅，即系比呢个（前作）更高（手），但又出唔到框框（现有限制），系咪要天才先做到，系咪要更加叻嘅人先做到？一系就（培育）出一啲更精英嘅人，一系就冇，（因为）已经失传。”
两位作为行内行外公认的一线演员也这样说，很难不灰心，但身处艰难时势，生活还是要过，工作还是要做，关键在于要选择自己想做的，所以郑中基和张可颐都决定参演《暖男爸爸》，因为心底里，他们有使命感，他们仍然觉得港剧有得做，要做，就得拣最好。
“暴龙哥”喜欢《暖男爸爸》剧本平实
“暴龙哥”解释，《暖男爸爸》的剧本平实，是他答允演出的主要原因。“睇剧本，佢冇Twist（扭桥）㗎成件事，唔会啲剧情转嚟转去，又有一个惊天大阴谋，爱情嘅话就出现第三者，唔系呢啲，系一套几讲人性嘅剧嚟嘅，同埋好少剧系Character driven（角色主导），多数都系一个好大嘅故事，一条戏轨，跟住就分分分，今次《暖》系由个Character（他饰演的林世荣）出发，佢做到嘅、遇到嘅所有嘢，我相信好多市民都会遇到。”
回望过去20集《暖男爸爸》，故事涉及个人和家庭，包含成长（暴龙哥与小英）、追梦（阿荣、章尾而饰演的阿E）、爱情（强尼饰演的Lantau与陈俞希饰演的Bianca）、别离（张可颐饰演的罗芷明跟丈夫离婚、余香凝饰演的余超琼遇交通意外身亡），还有老去（刘江饰演的波哥患认知障碍）等人生不同阶段，有高有低，有快乐有伤痛，郑中基直言，《暖》其实不止是剧集，是透过不同角色的遭遇，让观众有共鸣，作为解决自身问题的参考。“我哋嘅故仔会有解决方法，当然唔系人人都用到，但起码会令观众知道，我哋做紧乜嘢，我哋知你感受紧啲乜嘢，我哋可以话畀你听，如果呢个Situation（处境）要点样解决问题，就算唔得，你哋都可以拎我哋（剧中遭遇）嚟做Example，所以我觉得几贴地，几啱而家啲观众睇。”
20年后再合作 张可颐：想见到唔一样嘅郑中基
剧本贴地，是郑中基接拍《暖男爸爸》的主因，而他这个人，就吸引到贵为无线视后的张可颐首肯参演。事实上，这是他们继《缘份无边界》，20年后再度合作。“我同Ronald好耐之前合作过，大家都知佢以前嘅作品都系搞笑为主，所以今次我都期望能够见到一个几唔一样嘅佢，一个好Grounded（贴地）嘅佢，所以当我知道今次拍档系佢，我就二话不说答应咗。”还有剧组说故事的方式，同样令视后愿意合作，“最Impressed嘅第一样嘢系编剧，亦都系呢套剧嘅监制（戚家基，Peter）首先接触我经理人，以前嘅经验系，只会睇文字简介，但今次系一本漫画，佢畀我睇嘅系图画，我会立即Catch到今次成个项目，佢哋嘅Theme（目标）同埋个Dream（理想）系想做到咩方向。”至于剧本扎实，亦有助她入戏，“好好多，因为对白已经有呢啲（吸引观众）元素喺入面，佢根本系Lead住你走，唔系你自己要设计点样讲先有Feel，系啲对白里面已经有。”
谈到最深刻的一幕对白是甚么，张可颐认为是罗芷明与丈夫Roger（邵仲衡饰）家中摊牌讲离婚最入心，“我都几钟意啲对白，去到Real action嘅时候，忽然间有句好哽到自己，啲眼泪就自己流出嚟。我记得呢场戏好深刻，同埋我当时太投入，之后我仲问番啲工作人员，系咁问佢哋得唔得。好似只系拍咗一个Take，我话千祈唔好嚟第二个呀，有都做唔番。”至于郑中基最深刻的，是有一场在家中照顾儿子“暴龙哥”（第11集），待他睡着之后，阿荣拾起以前一家三口的照片，霎时间，往事涌上心头，“之后就匿埋喺旮旯头度喊，喊完就冇事。”因为投入角色，郑中基承认，自己现时更能够体谅抑郁症病患者的苦况。“以前成日都讲‘睇开啲啦！’、‘睇啲开心嘢啦！’、‘唔好钻牛角尖啦！’，你以前自己喺度安慰紧佢，其实最好唔好讲。”
双鱼座遇上双鱼座 演对手戏一拍即合
对很多观众而言，郑中基从来是喜剧专家，张可颐则擅演正剧，两个人走在一起，要不要花时间磨合？张可颐说：“我唔使㗎！”然后问郑中基：“你系咪双鱼座？”他答是。“我又系双鱼座，所以好快就会Click到，同埋镜头背后我哋唔讲嘢㗎，一嚟（埋位）就入，一嚟就接㗎喇，所以啲嘢好夹、好顺。”更不会担心自己无法应对郑中基突然爆肚搞“烂Gag”。“佢唔系搞笑㖞，你错喇，观众一定会有好新鲜嘅感觉。”
“暴龙哥”亦指，正因为拍档是张可颐，他相当放心。“因为拍剧嚟讲，Maggie（张之洋名）系至尊嚟㗎。”张可颐立即反击：“我唔认老㗎下！”“暴龙哥”补充：“我唔系话老，唔关老唔老事，系𠮶个作品，你多经验嘛，一有咩问题，一定会睇得出，一定会讲。”张反问：“你又知我会讲？我可能会匿埋唔讲㗎㖞！”郑中基笑笑口说：“你唔系咁嘅人嚟，所以我就好定。”
他说，试过有一场酒店外景（第八集），讲述张可颐躲在厕所里打开化妆袋，发现Roger的剃须刀和剃须泡沫，一时触景伤情，打开水喉掩盖自己的爆喊声。郑中基忆述，拍摄期间他不时在厕所外窥看，“佢话：‘你唔好装啦，你当睇唔到，其实你自己眼尾睄到，就唔使喺度装！’我话，系㖞，咁样我就定好多。”张可颐则说：“呢个系大家拍档做对手必须要有嘅Quality。”
点击下图欣赏《暖男爸爸》更多剧照：