【瞩目配角】鬼冢富贵传奇背后有段古　哭诉童年惨况：人点可以卖

大概“赚钱买花戴”，已经不足以形容鬼冢，甚至低估了身为传奇时装设计师的他。2018年以基本艺员合约加入无线（TVB）之前，鬼冢已经是神级人物，他不仅拍过几十套戏有“金牌烂仔”之称，更造衫造到风山水起，家中“波子”、Benz、MGB等名车摆到行唔郁当摆设，80年代一炮过用138万现金买起九肚山洋房，但03年却一夜结束整个与他同名的时装王国；担任TVB特约演员时，鬼冢又试过揸保时捷靓车返工，后因座驾泊在电视城门外遭抄牌，变相倒贴打工，令同剧台前幕后感到震惊，“咁有米都做茄哩啡”。

场地提供：The Grill Room
特别鸣谢：Barry@relaxdearhk

入TVB过日辰　自称贪慕虚荣

今年66岁的鬼冢直认入TVB做演员除了是打发日辰，更是贪慕虚荣：“我2003年退休，系近年先苦苦哀求个朋友话想拍剧，佢系TVB导演嚟，于是叫我入纸申请，点知入纸一个星期后就有回音，《乘胜追击》系我第一套拍嘅TVB剧，得一个Shot啫，做收数佬，做完之后𠮶啲虚荣心即系返晒嚟！”而最近鬼冢亦有在重头剧《反黑路人甲》中，饰演“四联帮”其中一位话事人“马尾”，不过第18集便正式收工，被姜大卫、陈志健两父子陷害后惨遭活埋，发挥空间不及之前在《爱．回家之开心速递》第828集出现的“非洲鼓叶伯”。

点击下图观看鬼冢《反黑路人甲》最后一幕：

小朋友认得非洲鼓叶伯

谈起“非洲鼓叶伯”这个角色，鬼冢便显得眉飞色舞，细说当时的准备工夫：“当时公司畀咗个剧本我，要做一个打非洲鼓嘅伯伯，我返到屋企之后，就攞个厕纸箩，洗干净佢，调翻转喺度打，但系我上网发现原来啲Beat唔系咁样，仲要嗌啲好特别嘅声，我而家仲好记得，播出街之后又几OK，而家啲小朋友见到我，都问我可唔可以一齐影张相，记得我系‘打鼓伯伯’，都有少少成就感。”

点击回顾《爱．回家之开心速递》第828集“非洲鼓叶伯”演出：

徙置区成长　食教会奶水大

鬼冢在电视上的小小成就，比起当年冲出香港在澳门、北京、上海等地设开分店，一手建立出“鬼冢”时装王国，可算是九牛一毛，然而他今日所有的一切都不是信手拈来，更是得来不易，因为他的起步点比很多人低。鬼冢出生在50年代、成长于60年代，当时香港人口因偷渡潮和婴儿潮急剧增加，房屋、医疗和教育远远不及需求，小朋友挨饿更是常态，完全不似21世纪的今日。

“我哋住七层楼𠮶啲徙置区，边有机会返学吖。”6岁，刚好是入读小学一年级的年纪，但是1960年政府还未推出免费强迫教育政策，当时刚好受洗信主的鬼冢只好在天台教会度过童年时光：“朝早一起身就去楼上路德会，有啲校工、校婆倒啲奶水、畀啲饼干我哋食，咁就咁样养大我哋，咁样好好喇，玩一阵间就走，然后周围玩唔返屋企瞓。”

黑白相中的鬼冢更加有型，当年“黑魔”宝刀未老：

生命中最大心结　“人点可以卖”

一屋十兄弟姊妹，理应一同开心成长，但排第六的鬼冢却没有这个福份，成长期间，亲眼看着四姊、七妹和十弟被“送”走。生活平稳后，他亦尝试过找回一班失散兄弟姊妹：“我曾经同九仔（大律师伍健民）倾过，揾到返嚟又点呢，算啦，由佢啦，命运都安排咗。当年唔系净系我哋，有好多家庭都系咁，唔系点样有饭食。（有传系100蚊卖走十弟？）我真系唔知，我只系知道之后有饭食。”

问到鬼冢这段经历是否人生中最大心结时，他开始双眼通红，更数度用纸巾印走几近夺眶而出的泪水，他哽咽道：“有边个想，冇饭食呀！系好痛，人嚟㗎，点可以卖！”相信当时鬼冢的脑海正不断回想60多年来的一切，所有的苦与乐同时侵袭心头：“细个系好困难，困难到系要去偷香蕉，如果唔系冇得食；我而家有嘅嘢，都系我应该要，我冇做坏事，我由石硖尾住到九肚山有两栋，系我自己真金白银买，我要话畀自己听，你得架，你真系得架。”

用爱弥补童年遗憾

也许是童年不顺遂，鬼冢对自己的初恋女友──即是现在的老婆，以及一对仔女格外宠爱，就像以另一种方式，弥补那时候的遗憾：“好多人都会问，点解我屋企𠮶种家庭温暖，同其他人系唔同，因为我啲小朋友一返嚟屋企，系会揽住我嚟锡，‘爸爸，I love you’。（点样教？）其实我真系冇份，大概就好似以前老人家咁讲，乖嘅小朋友教唔坏，坏嘅小朋友教唔好，其实最重要都系我老婆功劳，佢好好，好固执去管佢哋嘅教养，到而家都跟进佢哋嘅仁义道德，佢哋一个男拔，一个女拔，都系唔关我事。”

鬼冢笑指自己属“娱乐组”成员，放假时总趁老婆外出工作，带小朋友到后山玩溪水：“个仔而家就做猎头公司，个女就辗转之后话想帮手睇妈咪间补习社，佢哋真系好孝顺。”

又肥又矮　靠把口追初恋老婆

鬼冢虽然没有亲口承认，认识到老婆是其毕生最大的幸事，但谈起结婚35年的老婆，他总是挂起笑脸：“我娶咗一个好好嘅老婆！”鬼冢自认当年又肥又矮，满脸胡须核核突突，“照镜都想打自己”，所以追女仔纯粹是靠把口：“当年拎住个箧周围做嘢，我哋做Tailor，上门度身订做，间公司执咗好耐喇，叫巴黎狄龙，咁周围敲门问人使唔使造衫，咁啱𠮶阵又冬天，佢又想造，咁就做咗畀佢呢个客仔，咁我梗系好耐先交畀佢啦，可以成日打畀佢吖嘛。（娱乐圈大染缸，老婆唔担心你曳曳？）边度会有人钟意我，我低下层演员嚟，当年入行都系因为修哥（胡枫）觉得生得样衰，所以先捉我拍《打藤》。”