【开工大吉77】车保罗转行做街市监督　感激妻子不离不弃

久未露面嘅车保罗日前亮相香港开电视节目《开工大吉77》，佢转行做街市监督，正职困身要收工后赶赴拍摄：“依家我做街市监督，返工要著制服、反光衣，唔可以乱咁请假，啲人约我拍嘢都要下午先得！其实都冇咩尴尬，要做咪做啰，由细到大都做过好多行，当年周梁淑仪揾演员，佢地睇中揾我拍戏，拍咗三套之后，觉得好好玩所以入行。”

车保罗就话当年最风光时期，每日现身不同剧组，但因赌博而失去所有：“当年真系忙到组接组，我大概风光咗十年左右，真系忙到去银行入钱都冇时间，每日一起身唔系问去边度开工，而系问朋友收工去边度玩！不过当年我赌钱，冇做咩投资最终咩都输晒。”

隐暪公司“秘捞”拍电影，最终被揭发而令车保罗事业出现危机：“当年有人揾我拍戏，咁我就呃公司‘生疱疹’，要去北京医病，咁公司梗系比我走啦！到我拍完返香港，叶蒨文喺机场东面出，我就行西面啦，点知佢见到记者要做访问，就话刚刚同完亚视嘅车保罗拍戏，咁就成件事都穿晒。最终都要返公司认错，最终被人扣一个月粮，同时又比税局查封啲户口，我当时心谂真系玩完喇。”因为“讲大话”而离开电视圈，其后转战影坛，亦因为诚信而令事业跌入谷底：“当时因为冇钱请助手，自己又冇Mark清楚档期，最终搞到失场，呢啲丑事传千里，开始冇人揾我，静咗足足六个月，我都开始谂吓系唔系要转行先得。”

访问期间车保罗多次提及菲籍妻子，二人生活相当甜蜜，亦掌管车保罗财政大权：“当年我揾佢做钟点执屋，啲钱周围摆，佢就提我收好啲钱，我觉得呢个女人唔简单，开始试吓佢，发现啲钱冇少到，仲要好齐整咁摆好，我对佢都开始动心。后期我经济唔好，周围问人借钱，佢帮我记低借咗边个钱，要还比边个咁，所以到今时今日，我都争佢一个盛大婚礼。”