专访│演艺事业源于足球场　强尼感激父亲传授基本功：睇嘢阔咗！

人生从来都是一场觉悟之旅。
想起出自英国诡异浪漫公路剧《X你的世界末日》（The End of the F***ing World），第二季开首，便传来饰演女主角Alyssa的Jessica Barden旁白：“很多时，一些重要时刻，往往在你不为意的时候出现，直至你回头细想，才发现它有多重大。”（A lot of the time, you don't register the important moments in your life as they happen. You only see that they were important when you look back. ）
老土But True。
但用这段对白形容强尼（许博文）的演艺之旅相当贴切。1973年出世，即三年后这位型叔叔便50岁了，但直到近年回望过去才发现，中学时代两大兴趣，成就人生路上两个最重要篇章。
撰文：游大东
摄影：叶志明、梁碧玲
部份图片由受访者提供

人到中年成为“ViuTV一哥”　一切从官涌石地开始

17年前，强尼是个无名小卒，他在另一个职业界别打拚。“我仲喺间中型建筑公司做Project Manager。”机缘巧合之下，强尼加入有线球彩台成为兼职讲波佬，三年后离开建筑行业，全力开拓演艺事业。17年后的今天，睇《万游攻略》，他去克罗地亚土耳其柬埔寨游埠；睇《地产仔》，他演茶餐厅伙记；睇《有酒今晚吹》，他陪嘉宾一边饮酒一边吹水；睇《Chill Club》，见到他演唱苏永康的《愈吻愈伤心》；11月才播出的《全民造星III》，他已预留档期再任主持。相比“MIRROR人气王”姜涛，他才是名副其实的“ViuTV一哥”吧。

“我入呢行系因为有无限可能，我唔知会做啲乜，亦唔知会行咗去边，𠮶种兴趣同埋刺激就系喺𠮶度嚟。”

官涌球场，是所有事情的起点。“𠮶阵时好细个，我谂三、四岁左右，我住佐敦，每逢星期日朝早，就一定系成家人出去饮早茶或者食个早餐，阿妈去官涌街市买𩠌，老窦就带我同细佬在官涌球场踢波。”他所说的球场，并非今天在闽街旁边的佐治五世纪念公园球场，“以前石地（球场）有两个，大好多，即系而家嘅市政大楼。”

老窦许祖贤曾踢甲组　训练儿子睇波要睇阔啲

强尼的爸爸是前港甲流浪球员许祖贤，与郭家明及黎新祥同期出道，职业踢波跟为兴趣落场是两码子的事，难怪在儿子眼中，逢礼拜日出现的父子聚会毫不有趣。“系一个训练！𡃁仔踢波，一定系谂住落球场辘个波出去射龙门，但我老窦唔系，即系Training咁，跑圈先，之后我哋三个只系喺度搓波，唔畀射龙门，佢以前踢过甲组，所以用一个训练模式同我哋去踢。”

训练的除了控球技术，还有睇波的角度和分析，现在看来，统统都是基本功。“我嘅足球知识系喺老窦身上学番嚟，细个𠮶阵时，一播波就会睇，通常都会觉得，入波先叫好波，但佢教我：‘唔系嘅，有阵时射唔入，未必系前锋渣，可能系个后卫好呢？’咁你咪认识多咗，相比当时同年纪嘅人，我睇波嘅角度亦阔咗，因为佢真系由细踢波踢到大，呢样嘢对我将来踢波甚至讲波，系有好直接嘅影响。”

是的，强尼真的很爱踢波，怎么说？有得拣，答案自然会出现。那个年代生活简朴，没有智能手机没有SWITCH没有PS4，撇开睇电视听电台睇杂志玩卡牌游戏那些不说，可以参加的课外活动就只有运动，篮球班、羽毛球班、游泳班。“样样都有做，但最后都系钟意踢波，以前读男校（新蒲岗天主教伍华中学），唔知点解群埋成班Friend都系钟意足球，朝朝早，好神心，7点已经返到学校等开铁闸，一开闸就冲去踢波，上堂前已经成身湿晒，成班人好臭咁上堂。”

伍华仔大战工厂阿叔　用西瓜波被闹爆

年轻人有无限精力，上堂前踢一轮，食午饭时已“叉满电”，可以继续踢，而且会趁空档转踢新蒲岗的街场，地点是昔日百乐酒楼旁边，现在已变成百乐护老院。“买个饭盒，扒两啖，就再踢，日日都系咁。”空间有限，想踢波的人太多，“伍华仔”遇上区内打工的蓝领，清一色是大叔，他们不满“地盘”遭霸占，遂装腔作势：“𡃁仔，走啦！”。

年少气盛，这些招数怎会有效？“我哋又唔识死，唔肯走，佢有佢哋踢，我有我哋踢，争持咗一段时间之后，突然间有日班阿叔唔够人，‘喂，𡃁仔，系咪想踢波？同我哋踢！’”留意，强尼这班“伍华仔”踢的是西瓜波，毕竟价钱跟皮球相差很远，他们获邀后竟打算连人带波上阵，遭大叔喝住：“黐线咩？踢番皮波！”由那时开始，强尼开始和成年人切磋球技，踢到中七毕业后，入读城市大学工程系，先读高级文凭，再升读学位课程。

踢波踢到代表城大　对手后来变同事

在城大前后五年时间，顺理成章加入校队，踢后卫，曾出战大专杯，不少在球场上的对手，后来都成为同事。“同期嘅冯嘉奇系HKU（香港大学），我哋喺球场上对过，后来喺Cable讲波做过同事，仲有冼家裕，而家都有讲波，𠮶阵时佢系读教育学院（现称香港教育大学），仲有啲唔同学校嘅人，后来都系因为出嚟做嘢之后识番。”

“做嘢”是指由建筑转行做电视之后。强尼承认，当年在城大毕业之后，随即加入建筑行业，没想过人生会经历翻天覆地的变化。“当时谂住读完建筑咪出嚟做地盘，毕业后就入去大公司做，第一单就系起志莲净院，但因为𠮶个年代有‘八万五’，房屋署有好多Project，于是后来公司就将我调咗去专组起政府嘢，就算转工之后都系咁，起球场、警局、消防局、学校，都系建筑署Project，前后夹埋都做咗8年。”

做建筑八年有车有楼　满足感盖不过压力

打工仔，有边个唔想升职？强尼入行初时都以为自己会如此，但日子久了，他开始质疑自己。“好似已经睇到将来人生条路系点，当时我已经系Project Manager，月入三万几，有车有楼，生活OK，做多几年，就系Senior Manager，再多几年资历，就算到Project Director，再上就系Director，当然唔一定做到，但Career path好清楚。”亦因为建筑追求实用安全兼备，细致是王道，所以相当适合“工作狂”。

“我谂我刚入行做Assistant Engineer，好彩跟着个‘大佬’，劲勤力又单身，一个星期有三、四晩都会做到11、12点，咁我又想学嘢，所以每朝都系返早上8点，喺天水围开工，夜晚跟佢一样收咁夜，升职又快，同埋以前我系一个好逆来顺受嘅人，读建筑咪做建筑啰，好正路，但愈做落去就觉得，我唔系真系自发咁勤力，去到做咗8年，我就问自己，系唔系真系咁钟意而家做紧嘅嘢？”

每一项建筑都是集体工程，强尼发现日常工作中，绝大部份时间都是对人不对事，“每日处理人际关系，系多于建筑，耐咗就有少少唔系好钟意𠮶种感觉。”当所有事情加起来，得到的满足感仍不能盖过压力、痛苦和奄闷，就是离开的时候了。

赌波合法化成契机　做冬正日面试做讲波佬

又回到2003年。有一天，强尼觉得有种说不出的奄闷，他不想未来30年如一日，适逢当时正值政府通过赌波合法化，有线电视增辟专为赌波而设的球彩台，强尼热爱踢波，很自然会扭开来看，“命运自选台”在毫无预告的情况下发挥作用。

“我记得8月开台，两个月之后，有个主持突然间话唔做，喺节目讲Bye Bye，然后直接公开招募：‘你哋想嚟讲波就嚟啦！’我就谂：不如试下啦！因为只系坐喺度谂，其实系冇选择权，你要做咗𠮶样嘢，真系畀个机会你，你先有得选择。”

坐言起行，他真的寄求职信去有线，冬至前一天收到电话，话筒传来一把颇晦气的声线：“喂，唔该Johnny Hui！有线电视打嚟，听日夜晚9点钟上嚟Interview。”强尼霎时间以此反应：“听日做冬㖞！”对方没好气的说：“咁点呀？系咪唔嚟呀？”强尼当时觉得，没有比追梦更重要，以麻甩佬的沟通方式回答：“嚟啰！”

因为“一时冲动”，那道通往五光十色的演艺之门，就在这段通过程中渐渐打开。很多时，一些重要时刻，往往在你不为意的时候出现，直至你回头细想，才发现它有多重大。

（强尼专访二之一）

点击下列图辑，欣赏更多强尼的幕前演出型佬相：