陈柏宇老婆符晓薇第二胎宫外孕：大量出血要切除输卵管

陈柏宇与老婆符晓薇（Leanne）婚后好快诞下囡囡Abigail，一家三口相当幸福，佢哋一直想追多一个小朋友。Leanne日前拍片自爆早前宫外孕：“医生话我子宫大量出血，最终决定切除（左边输卵管）。”

陈柏宇老婆符晓薇宫外孕流产　盘点六位伟大妈妈曾经历锥心之痛

Leanne喺家中拍片，希望同大家分享心路历程为同路人打气：“5月时知自己有咗，家人都好开心，有咗之后过咗一两星期开始出血，腹部经常有痛，去睇医生照完话见到胎盘位厚咗应该无问题，自己都安心。之后继续日日出血，个几星期去覆诊当日自己个肚痛得好严重，痛到以为自己盲肠炎，最终去咗医院，一照之后医生话我子宫大量出血。”

由有BB嘅喜悦中被逼要接受失去小朋友，仲要即刻接受手术，Leanne话心情都好大起大跌：“好记得𠮶日系6月1号，我地紧急入院做手术，医生话系宫外孕爆咗输卵管，医生都有畀我拣切除定修补，上网睇原来好多妈妈都有同样经历，医生亦有讲修补咗都比较大机会再破裂，亦见到网上好多人分享真系同一位置宫外孕，所以最终我决定切除（左边输卵管）。做手术时唔系好惊，全身麻醉后做完手术被拍醒，呼吸好困难，一醒就呕。返到屋企妈咪嚟照顾我，好似坐月咁，身体状况都回复得七七八八。”

Leanne坦言当时心情低落，坐小月期间不停胡思乱想：“做完手术后谂咗好多嘢，知道无咗后好失望又好失落，好失望系大家咁开心后落空，好失落系我哋真系好想多一个BB陪Abigail，大家有个伴。如果问我会唔会惊咗怀孕？系有嘅，因为有第一次比较大机会有第二次宫外孕，医生话其实三个月后已经可以再试造人。身体上OK但心态上其实未准备好，听到人哋叫我地快D有BB会觉得好讨厌。”不过喺家人朋友陪伴下，Leanne亦渐渐走出阴霾，希望呢次分享可以为同路人带来支持。