闻好友杨明涉醉驾“炒车”被捕　张振朗大表震惊：揸车就唔好饮酒

张振朗今日（8/8）现身电视城出席无线新剧《反黑路人甲》宣传活动。振朗表示在剧中演一名警方资深卧底，与王浩信联手渗入黑帮社团搜集证据，“今次我同浩信系第二次合作拍剧，火花同默契系依旧，我哋拍嘅时候，会你一句我一句接住落，仲会有时会爆肚，而我又系最唔忍得笑𠮶个，仲会笑咗出嚟，不过监制都会照收货。”

提到好友杨明今日凌晨涉嫌醉驾“自炒”被捕，张振朗表示：“我睇到相关报导嘅时候，真系好震惊估唔到，我觉得最紧要系佢个人冇事，有啲咩嘢都系等佢回答。（有冇联络问候佢？）我谂呢段时间等佢处理晒佢自己嘅嘢先，咁之后其他嘢先后再算。（案发前有冇见过面？）呢个就冇，因为我都好耐冇返公司。（最近见面系几时？）都成个几月前。（你饮唔饮酒？）我唔饮酒。（应酬难免有酒落肚，酒后会否揸车？）当然揸车就唔好饮酒啦！”