黎诺懿亲子活动亿元豪宅曝光　复式连天台搞pool party都无问题

自从囝囝黎峰睿（小春鸡）出世后，黎诺懿与老婆李洁莹不时都会喺IG分享囝囝嘅生活点滴，每次睇到小春鸡喺坐住架玩具跑车通屋走，又或者喺天台搞pool party、种植物时，网民都惊叹连连，甚而喺google输入黎诺懿时，会连随出现“住边”嘅搜寻建议。

曾经住过㓥房、又住过西贡村屋嘅黎诺懿，因为老婆嘅关系，所以曾有“五亿女婿”嘅称号，有传2016年二人结婚时，外父外母因为担心黎诺懿打无线工朝不保晚，所以买入4千万豪宅作为结婚礼物送予二人，属真属假不得而知，但黎诺懿自《爱·回家》马壮一角上位后，工作成绩、吸金力都有目共睹。

婚后与老婆由西贡搬出市区嘅黎诺懿，入手何文田大型豪宅屋苑，由其IG相估计，单位应该系复式连天台，据地产网页资料显示，全屋苑有22个复式连天台单位，面积由2388至4136呎不等，部分采用6房3厅连4套房设计，而20呎特高楼底加上40呎长巨厅，更令人犹如置身独立洋房一样，市值过亿。