麦包疫市创业主打卖日本和牛　仲做埋外卖仔：路始终要行

前无线艺人麦包（麦长青）与友人合资过百万于香港大坑开设主打日本和牛食材专门店，圈中各好友在疫情期间亦到场支持祝贺。为了打听麦包点解咁有胆量疫市创业，《香港01》就电话访问咗佢，“其实筹备到开业，都系用咗两至三个月时间，新铺营业咗成个星期，因为疫情好多工作都停晒，路始终都要向前行，而且又要生活，所以乜都要试。（点解主打日本和牛食材？）咁啱有个朋友搞日本餐厅，佢就问我有冇兴趣代理日本和牛，虽然自己未做过，谂吓都要揾钱交律师费，于是就应承咗，我认为有危就有机，唔博就冇机会啦！”麦包又指现时太太同女儿都会落铺帮手打点做宣传，而自己就会帮手送外卖将食材送到客人手上。

讲到汤宝如日前（22/7）在社交网络平台上载与老板麦包在店内合照相，并发文话：“麦包开铺，一定要支持。”有网民在帖文下留言话：“以为卖包！”汤宝如随即回应话：“系呀！同你打包。”有其他网民不值其所谓，炮轰汤宝如：“哗！人哋一句以为卖包，就话同人打包，恶到咁⋯公众人物收伏敛下啦！”，随即引来大批网民与汤宝如隔空对骂。

麦包就话：“其实佢都回应咗，佢都话讲笑，我多谢每一位嘅朋友，佢哋落嚟撑我都系好朋友，做生意都系想以和为贵，开开心心啫。（开业成个星期生意好唔好？）之前都冇人知我开新店，不过呢几日啲朋友都好帮得手，帮手Po上网，喺呢个疫情期间大家都守望相助，系一件好事。”

（点解开业咁低调？）麦包慨叹：“唉！喺呢个时期，高调做乜鬼嘢呀！因为人多聚集就怕传染，无谓搞咁多啦！尽量简简单单开档就算，熟嘅朋友就会知。（开新铺宣传好重要！不过阿汤单嘢帮你炒热晒啦！）而家变咗高调啦！咪当宣传啰！不过大家又唔好将呢件事发大，始终佢都解释咗，无谓再纠缠系呢件事上。”