关智斌邀爸爸拍新歌《日月》MV　靓仔过Kenny自爆曾想考艺训班

关智斌（Kenny）今日（13日）推出新歌《日月》，MV除咗有入围今年香港电影金像奖最佳新演员嘅陈湛文（Peter），更请嚟神秘嘉宾客串，Kenny自揭：“就系我daddy！阿关老先生啦！”关爸爸保养得宜相当有型，佢仲自爆曾经谂过考艺员训练班﹗

问到点解会揾爸爸演出，Kenny话：“因为同导演一齐去create呢个故仔嘅时候，大家谂由老、中、青三代角度去拍摄，故事入面嘅爸爸系牺牲咗好多自己嘅时间，成全咗三代人嘅幸福，好似我爸爸做紧嘅嘢咁。我突然间谂到既然呢首歌系讲喺我生命中对我好重要嘅人，加上‘爷爷’呢个角色戏份唔算好重，又唔使做好多戏，所以我就谂不如叫我Daddy去试吓。”

首次幕前演出嘅关爸爸坦然好紧张，不过Kenny就大赞：“最开心系见到我Daddy都拍摄得好开心。见到佢化妆、整头、埋位都好专业，令我都发现我嘅演艺天份原来可能都系来自于我爸爸。”原来关爸爸学生时代曾被老师选中当话剧男主角，不过关爸爸因为对白太多而拒绝，Kenny立即大呻：“你知唔知你个仔我真系要艰辛咗好多年先至可以做男主角呀老窦？”关爸爸亦随即安慰，“咁我唔系（演戏）𠮶块材料吖嘛，而家咪留番俾你啰。”

关爸爸亦透露当年毕业后打算投考电视台艺员训练班，可惜最后欠缺勇气而告吹，在旁的Kenny听到后笑说：“好彩你冇咋，如果唔系到时未必生我出嚟；如果唔系边有咁快追咗我阿妈番嚟，到时我分分钟未出世，而家咪冇得坐喺度叫你拍MV？哈哈。”Kenny表示没谂过请得老父出山，问到酬劳会否特别加码，Kenny笑言：“系搭膊头，因为家用我会酌量加番啲。”