【口水多过浪花】冯盈盈忆台庆终极性感晚装　自爆：望到实物吓亲

冯盈盈入行后每次出席大骚，衣著都令人眼前一亮，特别系18年台庆当晚，一条黑色绣花两侧全透视晚装，终极性感登场令大家又惊又喜。呢日佢担任郑裕玲主持电台节目《口水多过浪花》访问时，大爆当日拣裙内幕：“睇相时我只睇到正面，望到实物真系吓亲。”

FYY当晚一出场已经成为焦点，佢仲自爆无打底：“为美感同线条而咁做，希望出嚟靓啲都豁出去。”镜头前受访落落大方，但原来拣呢条裙背后有故事架﹗“𠮶条裙其实有故仔，造型师本身喺海外品牌拣几条俾我睇，呢条裙睇相时我只睇到正面，REF.相系睇唔到侧面，点知原来系全透视。喺以色列寄到嚟，望到实物真系吓亲唔知点算。”

造型师当时就叫FYY著肉色T BACK，DO姐喺节目中即时表示影出嚟唔靓，FYY就话：“其实当晚我都有著肉色T BACK，不过系开骚前，又系有故仔。条裙喺台庆前一星期先送到香港，我条T BACK都系到咗之后先去买，所以夹埋两样嘢系开骚前半个钟，著起真系唔好睇，同本身肤色唔同两截咁，最终就决定除啦。当下系怕穿崩嘅，其实当晚我仲要撞正女士每个月唔舒服，实际上系著唔到内裤但又撞正唔舒适，都系我人生第一次用棉，都系开骚前半小时喺厕格发生，只知道一定要顶硬上﹗真系血泪史。”