【辣伙头】邓月平6岁煮饭学做人妻　厨艺出众帮人切带子受伤硬撑

想当年《美女厨房》令观众见识到，好多女艺人嘅厨艺，相隔多年后ViuTV开拍煮食综艺节目《辣伙头》，首集于2月10号晚播出，邓月平（Larine）都系参赛者之一。赛前唔少人以为 Larine 人仔细细，何来似个厨师？但其首集表现已相当惊艳。

原来 Larine获邓妈妈真传6 岁已经开始炒菜煮饭：“我谂大家唔会觉得我识煮嘢食，其实我 6 岁开始，妈咪已经叫我入厨房帮手，切吓𩠌煮吓嘢食，因为屋企人觉得小朋友独立系由细培养，所以屋企嘅家务同琐碎事好似缝纫、简单木工，爸爸妈妈、外公外婆都有教我做，佢哋觉得我将来作为一个贤淑嘅太太，系必须要识嘅。”

首集参赛者洛儿煮到失火，Larine 竟然唔怕热又唔怕火，一手帮对方拎开着晒火嘅煲，在旁工作人员就吓到碌大眼，Larine话：“当时洛儿切紧嘢冇顾到个煲，咁啱我同佢同一张台，我喺隔离见到佢冇反应，情急之下伸手帮佢攞开只煲，希望令到个煲离开热力，唔好个火愈烧愈大，然后 Christian（主持杨尚友）用煲盖整熄个火，最后都安全，拍摄都冇出咩意外。”

之后有次 Larine 又帮另一位参赛者切带子，结果左手手掌中刀收场：“我帮佢开带子时太急啦，成把刀队咗落手，当下我见有啲血飞出嚟，就即刻用纸巾包住只手，然后不断换纸巾，因为伤口都几深，到煮完系成个比赛冇人发现我受咗伤，我系隠藏得非常好。”