【早霸王】男听众为心仪对象亲自下厨　森美：我唔信你无食埋糖水

今日嘅《早霸王》嘅“你知唔知道有人挂住你”又再成功撮合咗一对乱世情侣，男听众Sam表示早几个月识咗一位新嚟嘅女同事，由于对方工作认真又勤力，兼会明白别人难处再去配合，所以令佢有表白嘅打算。“我好鬼穷又好庹缩，佢陪我食cheap cheap嘢。最近我哋都有倾过，会唔会系因为我庹缩，所以解放咗佢内心庹缩个性，因为佢本身成日去旅行，又会食贵嘢。”Sam又表示对呢位女同事第一印象系公主仔，不过问到呢位公主同事系未有啲钱先，Sam起初就话唔清楚，仲话唔多care，后来佢又转口风话：“觉得佢都有啲钱。”

虽然二人未发展为情侣，但早已拖过手同揽过，而喺森美嘅追问下，Sam亦承认有锡过对方。“早排我曾经请佢食过饭，喺系我屋企自己煮，当时想表白，但同ex有少少关系要处理，我叫佢等我，同埋会准备一个惊天动地表白俾佢。最近佢有埋怨，话‘吓，等劲耐啰’”虽则话系埋怨，但听落就似系撒娇多啲，森美对于男听众餐饭十分好奇，不停追问有无食埋“糖水”，虽然Sam坚称无，但森美就话打死都唔信。之后Sam又爆二人嘅浪漫史，佢话自己家住九龙，对方住大埔，为追女，佢之前试过由九龙去大埔接对方一齐返工，而喺一齐识港铁时，Sam借势揽住对方。“佢好惊同事见到，成日话唔好掂我。但揽完之后都仲有揽过……”

电话接通Sam心仪对象急急子后，虽然佢话无拍拖亦无人追求，但问到“有男仔想同你表白”时，佢就话“知道，因为佢有同我讲过”，但问到呢位男仔叫咩名先，急急子竟然话系“pan”，森美同小仪似乎都比呢个名搞到有少少乱，为怕搞错，于是马上向男方求证，期间急急子就好紧张咁话:“好尴尬，可唔可快啲完？”结果发现原来系虚惊一场，表白开始，Sam话知道急急子有意去外国读书后，好唔开心（下删一百字）之后就问咗句“可唔可以做我女朋友？”急急子嘅第一个反应系：“我要讲咩？好尴尬呀！”Sam当然唔会放过机会，叫佢讲“可以”，急急子最终都说了一声“可以”但亦不忘表示：“可唔可以快啲完？”