【晚吹】学生记者大申诉：系主任曾反对采访任何反送中活动

最新一集《晚吹- 又要威又要戴头盔》揾嚟四位化名PePe、T、阿本、卡比兽嘅学生记者大谈辛酸史，四位都表示由于人手问题，所以虽然本身唔系前线，但都不时要去跑新闻。由于记者证不被记协承认，所以不时都会被藐、遇到大细超嘅情况。PePe指运作上，虽然同新闻社大同小异，但经费少得可悲:一年只得七千元。而呢笔钱，大多用在租房同邀请嘉宾之上，学生有咁多房，点解又要出去租呢？PePe解释系因为学生无一个可以24小时做嘢嘅news room，所以遇上有大新闻时，又要打稿又要剪片，唯有外租party room。“一年七千元，25个人去用，经常自己贴住先，claim钱就睇校方心情。”

另外几位学生记者虽然情况好啲(因为单系印刷费一年就有差十几万元)，但由于啲钱大部份用在印刷之上，变相无钱增添器材：“上年先……买咗第一部相机同镜头，以往系有相机，但快门等如慢门，成支庄嘅财产就系一部相机。”提到近几个月嘅社会运动，PePe就话试过6月时被困示威区：“学校当时有打比老总问点解仲有人做报道，我交待左前面警察唔比我走，示威者又未散，个情况维持咗一晚。学校之后有开会讨论点解我会stay成晚、呢啲情况学生会是否要订规举。虽然佢哋系有开呢个会，但由终至始都无打过比我问有无事又或者无去了解件事。”之后PePe更表示曾经收到系主任嘅email，反对佢哋采访任何反送中嘅活动。“突然一刀切，但佢哋旗下营运嘅新闻机构就可以做呢件事，好唔合理。我哋联署要求对话，但被无视，仲话总之唔报得就系唔报得。”

另一位学生记者亦大闹学校无耻：“ 净系识send email有咩用？叫我哋离开危险地方，而家有警察冲入校园，枚园都变成唔安全嘅地方，你仲叫我远离又唔比实质帮助，真系觉得好无耻。”系啰，到底而家边个地方先系安全呢？另一位学生记者亦指校方都系以email形式叫佢哋远离危险地区：“10月时校方见到我地拍嘅片喺电视上播，我好记得email话‘我哋留意到学生记者喺示威事件中目击到枪击事件，我哋希望学生保障自己安全尽快离开危险区域’当时我睇完封email反应系x ，觉得点解可以不近人情，同埋你而家先嚟关心？”听落班学生记者都好多不满。