孙慧雪变孙露雪　被盗相卖美乳霜：偷图仲要改埋名

艺人经常拍广告做代言人，好多时都会试过用过先介绍产品服务，但有啲不法商人睇准明星效应，盗用相片为商品卖广告。孙慧雪呢日都中招，于个人社交网留言：“我完全无用过！”佢接受《香港01》访问时更表示：“其实已经唔系第一次。”

阿雪上载一张对话截图，有人传咗一张佢嘅自拍照，写住“网红孙露雪在IG上对这款美乳霜赞不绝口”。阿雪接受《香港01》访问时表示：“平时我自己卖广告或介绍过嘅产品，都有网友inbox问我好唔好用，今次又系有人问我系咪用过所以发现被盗用，担心有人被骗所以公开写出嚟俾大家知。”对于有网友话改名“孙露雪”改得几有心思，仲笑言只系认错人其实系波得野雪雪，阿雪就话：“名都改埋真系好搞笑，一系就用返我全名，但又cap返我IG，真系好有创意得啖笑。”

原来今次并非阿雪第一次被盗用相片卖广告：“其实之前都试过同类型事件，美容护肤都有，听到我一头雾水，有次连婚纱摄影都有﹗咁啱有朋友帮衬，个摄影师大大声话帮我影婚纱相，仲同我好熟，好在朋友问返我先无受骗。”阿雪坦言呢啲事真系好难避免，下载张相加啲字就得，都明白佢地小本经营，只能希望大家都诚实啲，今时今日呃人真系好易被揭发。