【马蹄露遇袭】因政见起嫌隙　侄仔马米高：屋企人对我来讲好重要

近月来因为逃犯条例掀起嘅连串风波，令唔少家庭因为政见问题变得对立。马蹄露一向立场鲜明支持警方执法，10月6日喺旺角同示威者起冲突终告受伤。佢同侄仔马米高嘅关系亦疑似因为政见不合生变。

马蹄露同YOUTUBER侄仔马米高一向感情要好，不时亮相对方嘅网上节目，马米高亦经常陪姑姐登台客串助手兼保镖。6月初刚提出逃犯条例时，马蹄露曾于IG贴出一张同侄仔小时候嘅合照，写上︰“喂！细路，我系你姑姐嚟㗎﹗”疑似已经起争拗关系不在。至本月初马蹄露在旺角示威区，因用手机拍摄而与示威者爆发口角及肢体冲突，最终疑似被“私了”，血流披面受伤，马米高对此一直都未有回应。

到10月16日贴出同姑姐合照留言话：“好多谢大家嘅问候，一切在心中。同屋企人意见分歧系一件正常不过嘅事。无论如何，屋企人有事我都会喺佢哋身边，好似佢哋会无条件照顾我一样，以前系咁，宜家都系。最近嘅事情，我接收到好多唔同嘅声音同资讯，当刻我有好多好多嘢想讲、想回应，但我更加觉得系而家社会咁乱嘅情况之下，我更加需要冷静，静落嚟等自己去沈淀一下。到咗呢一刻，我只系想讲：屋企人对我来讲好重要。For me, family comes first. It always did and it always will. ”