泳儿东龙岛拍MV下海玩湿身　“成个浪冚埋我块面”

下个星期三（16日）于九展举行演唱会嘅泳儿（Vincy），推出新歌《花心》，系佢今年推出三首“花系列”为主题歌曲中最后一个章节。泳儿表示第二部曲嘅《野木兰》讲述人性暗黑面，《花心》则透视人性内心深处：“每个人心深处都会有一啲渴望、贪心或者花心嘅念头，心里面有啲嘢好想做又唔敢做；又想做呢样、又想做𠮶样，我觉得‘花心’系人嘅本性，冇对或错。”

呢次MV去到东龙岛取景，原来呢个地方对泳儿好有回忆：“嚟紧演唱会嘅poster就系喺东龙岛影。我仲记得上次成三十四度，有工作人员中暑、有啲热到扯烂自己条裤散热。”上次攀山，这次则要下海玩湿身：“今次冇咁晒，今次主要系落水。我要浸喺水入面，但面唔落水，导演谂住只系浸一下，但系我哋敌不过大自然，因为啲浪一冲过嚟，有一吓大家都‘哗’咗一声！成个浪冚埋我块面，都饮咗几次海水。同埋虽然唔系喺水入面浸咗好耐，但一上水就发觉浸到皱咗皮，哈哈。”

MV继续由《野木兰》MV导演Sheng Wong及Fmlik操刀，泳儿透露是暗黑系列延续：“延续番《野木兰》内容，《野》MV讲天使同魔鬼慢慢转化成人，嚟到《花心》就系当佢哋变成人之后，佢哋会想做啲乜嘢呢？做咗人之后又会唔会系佢哋想像中咁开心、咁多姿多彩？”泳儿在新歌MV中饰演Falling Angel，转化成人后拥有超自然能力，所以MV入面会见到佢有唔少悬浮镜头。