张致恒老婆解释结婚黑面传闻　声称曾被恐吓：话要对我小朋友不利

KENNY关智斌刚刚完成个人红馆演唱会，但大家都应该仲记得，呢个SHOW本身系BOYZ一齐开，但正正喺售票前，Steven张致恒自爆已婚兼做埋爸爸，之后就被踢爆一脚踏五船，形象跌到谷底。注册当日佢太太区燕雯被指全程黑面，但呢日佢喺IG发长文，透露原来曾被恐吓。

雯雯呢日喺IG贴上注册当日Steven帮佢整理头发嘅相片，解释当日点解会收起笑容完全无开心嘅感觉：“完全冇想像过会喺咁多事情发生嘅情况下就嚟到呢一日。当然内心深处系好开心同兴奋，但实际上我系好惊好紧张好担心。结婚前一个月，我收到好多受害人加埋陌生人嘅一啲闹我，侮辱我，恐吓我，甚至话要对我小朋友不利嘅讯息，所以结婚当日我完全控制唔到自己惊同担心嘅表情+心情。”

作为妈妈听到有人想对囝囝不利，雯雯嘅不安心情绝对唔难理解：“我只系一个普通人第一次做妈妈，有咁多呢一类嘅讯息……当然我系真系惊有人会咁样做，所以当日我成日会周围望，个人好疑神疑鬼，冇咩表情，我绝对唔系有唔愿意同勉强嘅情况下去结婚。”最后佢话自己已经唔再系自己一个，会努力学习同成长，结尾写上佢地补摆婚宴嘅日子“2020.9.2 见”

留言全文：

2019.9.2一切都来得好突然..由细到大都冇谂过自己结婚会系点样甚至会唔会结婚

完全冇想像过会喺咁多事情发生嘅情况下就嚟到呢一日..当然内心深处系好开心同兴奋但实际上我系好惊好紧张好担心结婚前一个月我收到好多受害人加埋陌生人嘅一啲闹我侮辱我恐吓我甚至话要对我小朋友不利嘅讯息所以结婚当日我完全控制唔到自己惊同担心嘅表情+心情我只系一个普通人第一次做妈妈，有咁多呢一类嘅讯息..当然我系真系惊有人会咁样做所以当日我成日会周围望..个人好疑神疑鬼..冇咩表情我绝对唔系有唔愿意同勉强嘅情况下去结婚。

其实同一个人可以行到结婚呢一日系一种好大嘅考验..我唔知道人哋系点样睇结婚但系对于我来讲..结婚系一样一生一世嘅一件事我既然选择得同呢个人结婚无论发生咩事我都一定要陪佢行落去

最后无论系祝福同唔祝福我嘅人我都好想喺度同你地讲我而家已经唔系自己一个人所有嘅事已经唔系我一个人我一定会努力学习三个人嘅生活我会尽我嘅努力每一日令自己成长。

2020.9.2见～