木村光希米兰行骚成焦点 谢安琪陈凯琳孖住睇骚表现兴奋
撰文： 洪晓璇
出版：更新：
艺人顶住星二代光环，一入行固然会受瞩目，但要继续喺娱乐圈发光发亮，实力始终是最重要一环。木村拓哉囡囡木村光希以艺名Kōki横空现身，随即成为时装界超新星，呢日佢去到米兰参与时装骚，喺一众顶尖Model间亦绝不失色，谢安琪、陈凯琳两位靓妈受邀出席睇Show，唔知佢哋小朋友如果想入行的话，到时又批唔批准呢？
谢安琪话自己第一次参与国际时装周活动，笑言终于有机会出国参加盛会：“因为之前小朋友都仲系好细，一直都尽量安排香港工作，今年终于有机会，所以真系好开心！其实呢几日我都系拍摄，未有时间去玩，但系周围地方都好靓，真系好享受。而难得我哋都可以忙里偷闲，成Crew人一齐食餐好嘅。”
Kay演唱会举行在即，今次出席Fashion Week活动视为减压：“因为我之前一直都忙紧演唱会，出发之前我以为呢几日会好忙，可能因为风景太靓喇，我和同事都可以放松心情。演唱会后都想同家人再来一次，因为附近好多地方都好宁静，好适合我哋全家。”
陈凯琳第二次参与FILA米兰时装周活动，笑指自己有足够经验，可以好好享受呢场骚：“因为上年咩都唔知，以为睇骚要有咩仪态之类，今年我一早装备自己，可以享受场骚，见到每个Model出黎真系好兴奋！（有冇时间去玩？）头两日大会冇嘢安排畀我哋，所以同经理人去吃喝玩乐，谂起都觉得自己过份。”
Grace珍惜参与睇骚机会，成为她每年期待的工作，但系就婉拒成为Model走上天桥：“我谂我冇呢个勇气行骚啦，我觉得Model行骚时要保模好有型状态又唔准笑，加上好多人望住都几尴尬，我都系去番拍戏就可以㗎喇。（咁钟意Fashion骚，系咪自己好贪靓？）我哋成家人都唔系好贪靓咋，只不过系工作需要先扮靓，所以我哋都好一致！”