【早霸王】男听众被屈偷拍冲凉　 森美：公开闭路电视系好重要

又到星期五嘅“你知唔知道有人挂住你”环节，男听众阿明今次希望藉节目同女朋友道歉，而激嬲女友原因系因为涉嫌偷拍……
 

阿明早前同朋友去台湾旅游，期间仲一齐去咗夜店，返香港之后，阿明同同居女友一齐返乡下，点知就出事啦。“我女友细佬个女朋友冲凉时，发现有人偷拍，我女友怀疑系我影”由于阿明喺台湾夜店时，同朋友拍咗唔少影片，虽然据佢所讲“无特别色情”，但当女朋友提出check手机时，佢都十分淆底，最后仲当住女朋友面前将夜店影片删除，搞到自己“身有屎”一样。“其实我真系无做过，但怕比佢睇完电话之后会嬲第二样嘢。”阿明表示有拜托女朋友细佬帮忙揾附近嘅闭路电视证明自己系清白，之后亦好好彩咁真系揾到证据。听到呢度，森美都忍唔住话“公开闭路电视系好重要一环”佢呢一句，真系讲出唔少香港人心声。
 

虽然闭路电视证明阿明系清白，但并不代表女朋友就此消气，森美、小仪亦认为阿明删片呢个动作真系错得非常紧要，但亦都明白人喺慌张时会做得更错，“你话啲片无嘢，但佢（女朋友）幻想嘅片段系比你现实嘅更夸张”事实上，女朋友亦都有问过阿明点解当初唔坦白交代……可能系工作中嘅原因，所以阿明女友并未有接到电话，虽然佢要求森美再打一次，但森美就话“唔好啦，怕佢尴尬，你讲完再比返佢听”结果阿明喺大气电波中嘅自白如下“𠮶日其实都唔知发生咩事，我同你讲过好多次原因，希望你相信我，我真系无做过，同埋已经揾到证据证明唔关我事，希望你原谅我……”