【花椒之味】孖赖雅妍宣传新戏　郑秀文无信心竞逐明年金像影后

Sammi郑秀文七月完成红馆演唱会后，放长假到欧洲旅行，叉足电返到香港继续工作，为新戏《花椒之味》宣传。呢日佢同赖雅妍作客香港开电视《娱乐头条E-news Headline》专访，并接受主播马梓轩（William）关于姊妹默契程度小挑战。两位无论戏里戏外都默契十足，当雅妍即场清唱Sammi新歌时，Sammi更为对方和音。

其实佢地并非第一次合作，十几前雅妍曾经喺Sammi一首国语歌《未来》中担任女主角。而呢次结片缘，雅妍为演好Sammi妹妹一角，搜罗好多Sammi嘅相片：“因为我希望拍摄时，两人看起来更像姊妹，所以我经常把照片拿出来看，多看之后就觉得彼此好像好耐之前就已经认识嘅感觉！”呢套电影带出宽恕及原谅家人嘅讯息，Sammi亦好认同呢个观点：“当要面对一段崩坏或者看似撕裂咗嘅关系，彼此要懂得谅解，同埋有话好好说！以免将来唔喺埋一齐，或亲人离开时令自己悔疚！”

近年Sammi接落唔少具挑战性嘅角色，对电影奖项会唔会更有信心？“咁多年都系输嘅领悟！不过我觉得演好戏先系本质，同埋永远都要让自己进步，我反而介意自己有冇进步比较多！”Sammi更坦言无信心竞逐明年金像影后：“我拍咗四套戏，暂时只系得一套公映，另外三套都未知放映时间！我觉得咁多年嚟，自己嘅电影路的确比唱歌崎岖少少，不过唔重要嘅，只要一日有好角色，我都愿意继续努力！”