【后生仔倾吓偈】麦明诗曾hack入男友fb：复制佢沟女讯息e返俾佢

最新一集《后生仔倾吓偈》以“恐怖情人”为题，一听到呢个题目，麦明诗即时举手表示有嘢讲，佢透露当年喺英国读书时，发现身在香港嘅男友原来曾经追求另一女仔，但最终因为心软而原谅对方。“佢承诺唔会再同佢倾，点知后来我hack咗佢facebook，发现原来佢系咁同对方传讯息，虽然都唔系好严重，但对17、8岁嘅我嚟讲系奇耻大辱，于是我整个讯息copy再email比佢。佢好快覆返我email话要去跳桥，因为好内疚，承受唔到，所以想放弃生命。”由于当时麦明诗喺学校上紧堂，加上人不在香港，所以都几慌张，于是佢就同老师讲要休息一阵。离开课室之后，麦明诗考虑到如果佢因为男友咁嘅威胁而屈服，一段关系都会变得唔健康，于是佢最后决定通知男友妈妈。虽然麦明诗未有喺节目中交待结果，不过相信呢位前度都系得个讲……

其后，众人讨论到日本女友是否真系咁“Gfable”时，麦明诗表示“日本女朋友喺开心完之后，会同你讲真谢谢你”，嘉宾戴祖仪亦表示“听男仔朋友讲 ，人生一定要有一个日本女朋友。”到底真定假呢？曾经喺日本读书兼同当地女仔拍拖嘅黄庭锋就话呢个问题好难答，但透露如果同香港女仔比较的话，日本女生唔会太CHUR。“佢哋唔会太干涉你生活， 但某程度上又会觉得距离系远。（如果你成日好晚返，摆明去沟女呢？）佢哋好尊重。”咁真系叫尊重，而唔系放任？！一众后生仔不停追问日本女仔嘅床上表现，黄庭锋先系有少少尴尬，但讲到“咪就系……多谢啰”时都不禁流露出喜悦嘅笑容。

麦明诗即时追问“同我哋一般主流文化认识系未差唔多定有反差？”黄庭锋未有正面回答，只系话身边嘅朋友都非常享受，而佢亦十分认同戴祖仪所指嘅“语言上已经系好大分别”，并透露由于日本情侣唔会喺街上拖手或者揽揽锡锡，相比之下，香港男生会更显温柔，仲话如果识日文的话“市场会好OK”。