容祖儿大赞关智斌善良　反被指“Mean精”

容祖儿（Joey）同关智斌（Kenny）嘅旅游节目《斌祖二世古》来到最后一集，二人展开咗一段深情对话，原来十年前Kenny写咗首歌俾祖儿，但佢没有告诉祖儿，选择将呢个秘密埋藏心底，直到今时今日先讲出来，睇住Kenny 写畀自己嘅歌词，祖儿感动到眼湿湿。

祖儿 同Kenny 共事16年，讲起对大家的评价，Kenny回忆有一次一齐拍摄北京中央电视台嘅剧集，Kenny指当时祖儿因为剧组安排失当发火，但完全恶唔出样，令佢印象深刻。Kenny又指祖儿喺朋友当中系一名“mean精”，祖儿讲过一句说话令Kenny记足一世，“Kenny你真系好靓仔，不过可惜而家唔兴你呢啲样。”听番Kenny咁讲，祖儿即刻爆笑；至于祖儿就话Kenny一直都冇变过，系最善良的人，每次需要佢的时候，佢都会喺度。祖儿亦提到Kenny一个人返内地拍剧，系要好毅力先可以挨过，系好值得尊重。

Kenny随后提起，有一年颁奖礼令佢印象好深刻，当年祖儿夺女歌手奖嘅呼声好高，但网民话要集气喝倒采，坐在台下的Kenny表示好为佢担心，佢认为当年祖儿真系好努力，“我觉得就算你拎唔到奖，都唔deserve被‘嘘’。”祖儿得奖上台后，真系有人“嘘”，祖儿当时冲口而出讲咗一句说话：“你哋唔系‘嘘’我呀嘛？”祖儿忆起呢段往事，认为当年冲动咗，“因为觉得有责任去保护我嘅朋友、同事。”

因为呢件事，Kenny就填咗一份歌词《勇气情歌》鼓励祖儿，仲即场播俾祖儿听，祖儿边听边细味歌词，“好多谢你呀写歌畀我。”真系感动到呢。事后祖儿话：“冇谂过佢会识填词，而且系为我而写，感动已经唔能够去形容到我嘅心情。我哋都系睇住对方成长、睇住大家经历过啲乜，呢份友谊真系好难得。我真系好希望演唱会上可以唱到呢首歌。”

问到Kenny点解将呢个秘密收埋咁耐都唔讲，佢就话：“因为我个人比较内敛，亦都觉得唔好意思。”十年后佢将呢个秘密公诸于世，佢话多得公司content team同佢brainstorm番出嚟，“最后一晚，团队想我讲啲我哋之间发生过而佢唔知嘅事、或者我为佢做过啲乜，我都谂咗好耐先记得番呢件事。如果唔系呢个节目，我真系冇谂住讲。”

Kenny表示其实佢好钟意填词，以往每只碟都会有自己嘅作品。问到佢仲有乜嘢想同祖儿讲，Kenny话不如唱出嚟，“朋友嘅嘢心照啦，我哋好少讲出口，我哋通常唱出嚟，希望我再有机会为佢写只歌，用歌讲畀佢听。”