【婚姻合伙人】张嘉儿产后4个月极速修身　拍剧时好挂住个女

TVB新剧《婚姻合伙人》最近在翡翠台热播，除了两位主角杨明及高海宁之外，剧中不少配角都相当抢镜。在昨晚（14日）播出的最新一集中，饰演杨明舅姨Cat姐的张嘉儿，不满Demo王（古明华饰）只为个人梦想不理3个仔。虽然Cat表面上处处针对Demo王，经常对他恶言相向，但实际上就好爱锡3个姨甥仔，不少网民都大赞嘉儿的演出与以往不同，将角色心软和凶恶的一面都完美演绎，演技大有进步！

嘉儿在2007年参选香港小姐击败同届热门王君馨、何傲儿等，爆冷夺得冠军，更因为包包面被外界封为“阔面港姐”，受到网民抨击，指她是“史上最差的港姐”。虽然嘉儿入行多年来发展平平，但爱情方面就好幸福，2015年与金融才俊Nathan结婚，翌年诞下大女Leora，今个月初再诞下细女Hannah，一家四口幸福美满。目前在坐月的嘉儿今日（15日）凌晨在IG Post了一张喂母乳的照片，透露BB近况，大女也有帮手照顾妹妹，而自己就趁着空档重温自己的演出：“今晚呢个时候佢哋已经瞓紧觉，我就睇《婚姻合伙人》。大家可以留意下，有我份㗎。”

新剧在2017年初开拍，所以其实嘉儿在拍摄时只是刚生完不久，她在接受《香港01》访问时也表示拍剧过程不容易：“我都有睇返呀，我觉得自己做得都OK嘅，但仲有好多好多进步空间。𠮶阵囡囡得4个月，所以其实好难兼顾，因为我头6个月都系全母乳，我最有印象就系成日要喺公司泵奶。同埋好挂住囡囡，望住个电话睇住个女，有时佢喊我就心谂好想快啲收工返屋企陪佢，所以𠮶阵真系比较难。最记得有一场戏系高Ling喂奶，搞到我仲挂住个女，佢喺度喂奶嘅时候我又喂唔到畀自己囡囡，所以𠮶阵拍剧都好挂住囡囡。（点解咁快拍返剧？）𠮶阵时谂住自己应付到，因为已经过咗3个月，自己坐月又坐得好，觉得自己都好精神。”

嘉儿在剧中多数以OL Look出场，穿上短裙及高跟鞋展现优雅一面，完全看不出她只是刚生完4个月：“而家睇返套剧，𠮶阵都算系修身成功，希望今次都系。其实我系有Keep住游水，所以唔算肥得好多，都有Toning（塑形运动）啲肉都唔会太松，而且我生完三四个月就有做返运动，饮食方面都系食高营养嘅嘢。”

要同时兼顾妈咪同演员的身份的确不容易，嘉儿在拍完《婚》之后也没再拍剧，做全职妈妈：“𠮶套之后冇拍过任何剧集，都有少少挂住个感觉，都几开心嘅。但因为我好多时间都唔喺香港，我成日暑假都会返温哥华三四个月，所以啲期难就啲，同埋之后又有咗BB喇。（有冇谂过再拍返剧？）都想㗎，不过今次隔半年先，因为上次隔咗4个月有啲赶，尤其是我全母乳，要成日离开BB其实冇咁好，咁6个月佢开始食固体就会好啲，不过都要睇下公司会唔会再揾我啦。”嘉儿透露最近在筹备出一本关于喂哺母乳的书，希望可以在7月书展推出：“我都支持喂哺母乳，希望可以透过呢啲相令香港嘅女士唔会觉得太尴尬，大家见到女士喂母乳时都唔会有歧视嘅目光啦。”

点击下图睇嘉儿更多靓相：