张敬轩澳门个唱加场秒速售罄 网友：原价买到我食屎！
撰文： 洪晓璇
出版：更新：
香港地想睇演唱会好似愈来愈难，因为好多歌迷会专诚嚟香港睇SHOW，好在而家唔少歌手近近地澳门又会开多站演唱会，香港歌迷总算多个希望。张敬轩旧年喺红馆举行一连六场嘅“Hinsideout”演唱会一票难求叫好叫座。嚟紧将会喺移师到澳门威尼斯人举行，早前门票开卖即被秒杀，好多歌迷都话买唔到飞，有见及此，主办单位亦应询众要求，决定加开一场。
轩仔早两日喺IG留言话：“四面台的澳门演唱会是第一次做，十分多谢各位支持！Hinsideout澳门站加开一场！见大家咁好，一于又揾几首sidetrack唱俾大家听﹗”仲加Hashtag话降两度都会现身，歌迷听到当然开心，不过首先要买到飞先得。
+6
有歌迷留言话：“讲个万年不变嘅笑话：原价买到我食屎﹗”成功引嚟轩仔本人回应：“咁我买俾你，你食硬都得喇﹗”不过总有啲嘢系轩仔控制范围之外，好似㖊日朝早加场门票一开卖，又即刻搞到网络大塞车，好多歌迷都话入唔到个网、买唔到飞，随后主办单位宣布门票售罄。唔知轩仔私下联络咗呢位歌迷“送礼”未呢？