【黄心颖许志安】梁裕恒再撑心颖爆真相：许志安唔会犯咁低级嘅错

早前黄心颖与许志安被爆出于的士车厢激吻事件轰动全城，外界齐声怒骂呢对出轨男女。不过落选港男，曾于IG大赞“心颖bb可爱靓女”的梁裕恒 （Flow Leung）却竟然发表连番“伟论”力撑心颖，出post爆料，指心颖其实是事件中的受害者，她只不过是爱错了人，误信许志安会跟老婆郑秀文 (Sammi) 离婚，所以才会跟对方在一起，是个一心追求爱情的女生。于是Flow即被网民闹爆，被指抽水搏上位，然而他仍未肯收口，连日来继续讲唔停。

昨晚Flow又再出招发功，拍了一条短片放上youtube，并于facebook出post转发该片，留言：“断送了前途，但是问心无愧！真心胶。如大家仍要针对人，不针对事，我没办法！”大家就一齐来看看Flow如何“真心胶”。他强调要将事件的真相告诉大家，还讲明：“无兴趣追求真相可以离开，睇完继续闹我都无问题，对我完全无影响。”

今次Flow化身成金田一，质疑安心事件背后的阴谋论，他在片中提出了多个疑问，直指事件当中疑点重重，并非片中所见咁简单，怀疑成件事是有人早有预谋，叫大家仔细想想和分析一下。他还将火头辣向埋马国明与Sammi身上，声称两人于事后的反应言行不合情理。不过Flow在发放该片一个多小时后，就删除了。

以下是Flow于片中所讲的言论：

各位网友大家好，由我发表𠮶篇文章之后，网上嘅论调开始有所改变，再唔系单纯简简单单咁去讲成件事对定错，而系大家去寻求真相，因为成件事有好多唔合理地方，好值得大家去思考。

咁我以下落嚟拍呢段片嘅目的，就系讲番个真相畀大家听，有兴趣追求真相嘅人可以留低，无兴趣嘅人可以离开，或者睇完继续闹我都无问题，对我完全无影响。嚟紧我会问大家一啲问题，大家可以自己去思考一下，唔好净系听我去讲，到最终我会畀番答案大家。

喺4月2号𠮶晚，呢段关系已经发生咗两年，有几多人系知道呢件事，有几多人系鬼？第1条。

第2条，楼下有几多架的士喺度，佢哋上咗唔同的士，会唔会有唔同答案？唔同嘅结果出现呢？

第3条，车入面有4个角色，一个负责揸车嘅，一个系第三者，即系肥仔，无咗肥仔成件事能唔能够成功呢？𠮶个揸车嘅系咪又系单纯系揸车咁简单？香港所有车都系右軚，而所有车cam正常都系会影住左手边，因为乘客通常都系喺左手边上落，当晚许志安坐右手边，点解个车cam一早会对住右手边？佢点样可以一早预先知道许志安会坐喺右手边呢？车入面边个角色做到呢件事？

一般普通人嚟讲，都唔会喺的士揽揽锡锡，点解？即使无车cam喺度都好啦，因为始终有个第三者喺度，点解要咁做？而且佢哋系知名人士，许志安呢啲咁经验丰富嘅艺人，正常唔会犯呢啲咁低级嘅错误，一定有原因。会唔会系个司机本身就系相熟、知道呢件事呢？

呢两年嘅关系，知道呢件事嘅人其实有几多呢？会唔会双方嘅伴侣其实都知道呢件事呢？坊间有流传佢哋嘅关系其实系默许咗嘅，郑同许都默许咗大家出去玩，但系许会唔会有机会玩出咗真感情，会唔会系一方想报复呢？发生咗整件事后，最大得益系边个？喺经济上最大得益者，边个宣传大咗？边个知名度高咗？边个受人同情咗？

我相信问到呢度，大家心入面都有答案，大家开始知道成件事并唔系咁简单嘅桃色事件。我系一个负责问问题嘅人，答案交番畀大家自己谂，呢个世界唔系每一样嘢都有答案，但大家一定要识得去问问题。

发展到呢件事之后，许志安出嚟开记者招待会，佢话自己饮醉咗酒，色心起，佢尝试将呢件事变做一段性爱关系，变咗一件桃色事件，绝对唔系！呢件事并唔系当日发生，并唔系大家所睇到嘅所谓嘅勾引、主动，因为关系已经一段时间，所以系唔存在勾引或者主动，大家去谂番清楚呢一点。

然后到郑秀文嘅声明、马国明出嚟见记者，马国明嘅态度，好似覆述紧一个第三者嘅事，完全睇唔出有任何伤心嘅，大家形容佢系一个好男人，我形容，大家从来都冇爱过，如果爱过，就系冷血㗎喇。同样，郑秀文亦都系吖，当晚就话捉住大家只手，然后就话祈祷，然后就倾咗好多偈，大家有冇试过嬲过你老公？发生咗一个咁大嘅事件，即晚去原谅，有冇可能呀？会唔会只系一个公关嘅技巧，背后嘅原因系咩呢？会唔会系一啲商业嘅考虑呢？

点解我会企出嚟帮阿黄心颖，因为佢唔系卖，喺社会上、喺娱乐圈，呢啲事情系不断发生嘅。喺娱乐圈发生咗好多咁嘅事情，系冇人追究过，但今次，全城都喺度咁‘虾’一个咁嘅女仔，点解？因为许志安冇样？因为许志安冇钱？啲而家所谓嘅模范夫妻，曾经搞过人哋家庭、拆散人哋家庭，冇俾人话过，点解？因为佢咁就值得人尊敬、值得人欣赏？大家咁样睇嘢㗎咩？而家系笑贫不笑娼㗎咩？的确系，真系而家好多人系咁。

好多人话我出嚟抽水，我知我咁样讲，可能以后连嘢都唔需要拍啦，我知道一定会俾网民不停咁围攻，因为点解？因为大家唔思考、唔谂嘢、唔会追求真相㗎嘛！不过我亦都知道，好多都只不过系网络打手，全部假account，空号嚟嘅，点解会有人想尽快平息呢一件事呢？都系一个商业考虑。咁慢慢已经有报章去报道，或者有网上评论员去越讲越接近个真相，我相信好快会还我一个清白。

仲有Flow喺ig嘅相, 以及安心事件相关嘅相：