J2人妻女神梁芷珮计划带团游意国：试吓水温！

J2旅游节目《潮什么》系列主持梁芷珮（Christy）多年来，一直深受网民欢迎。身为三名子女之母的她依然样靓身材正，更被封做“J2人妻女神”！正在播出的《意大利潮什么》Christy就继续带大家玩转意大利，到访意国十三个城市，令不少观众都郁郁想订机票！Christy日前就在IG顺意民意，计划开团带大家去旅行，短短几小时已经收了超过30个私讯话带兴趣参加，认真厉害！

Christy接受《香港01》访问时就透露因为一直好多人问她会否带团，她称：“仲系初步阶段，试水温睇吓系咪真系咁多人想跟我去玩！其实一路都好多人问我会唔会带团，因为我好多节目嘅内容好多人都话去唔到。我都一路都有谂法，但就未正式去筹备，咁啱呢一排我去完北欧返嚟，好似有啲时间可以试吓，真系越嚟越多人问我，所以先有呢个构思！”

问到Christy怕不怕带团会辛苦，她就称不会：“我唔怕辛苦，因为我觉得好好玩。我平时拍节目真系我同我老公谂晒所有所有嘅嘢，由开头谂地方，拣乜嘢内容啦，联络啦，去到现场拍嘢，除咗有人帮我哋剪片之外，其他所有前期同后期都我哋两个自己搞，虽然好多嘢做，但我一啲都唔觉得辛苦，因为好难得会有一份咁好嘅工。你叫我坐喺office朝九晚五未必可以咁enjoy，呢一个真系寓工作于娱乐。好似我哋最长去30几40日，完成一日假都冇得放，日日朝早7点出去拍嘢，夜晚9、10点先返嚟，返去酒店再入片，但我哋都好enjoy好开心。”

除了带团外，Christy亦计划出旅游书：“其实好早有人叫我出，但𠮶阵出版商想我出亚洲，我唔熟所以就推咗。有时间我会出关于欧洲旅游书。（会唔会出写真？）写真就冇谓，一把年纪仲出咩写真，出有资讯性嘅旅游书好过啦。”而Christy亦计划做KOL，她称：“我会拍做gym video，因为想做多啲啲人好有兴趣，成日会问我嘅嘢。（几时开始做gym？）呢几年开始做gym，11月拍新剧《她·她·她的少女时代》先做好密，几乎每日都去做，就算唔做gym都会boxing或者跑步。因为喺剧入面做曹永廉嘅情人，仲要衣着都几贴身，所以努力练腹肌。（怕唔怕KOL竞争大？）唔怕，因为每个人都有各自方法，我自己心态都唔睇到咁大，因为我每日都会做运动，只系叫老公拍埋，修剪睇靓少少等人容易啲睇，有兴趣咪睇啰，觉得冇用嘅咪唔好睇啰！”