Coffee林芊妤惊患乳腺炎　零晨2点痛到醒：有一边完全塞晒

细个时好多香港小朋友都系食奶粉大，而近年就转趋推崇母乳，始终人奶可以为BB提供无可取替嘅抗体，唔少女星都身体力行喂哺母乳，Coffee林芊妤就系其中一位。囝囝Baby Chak眨下眼就快半岁，Coffee一直亲力亲为凑B，点知呢日因为鲠鱼骨入院，正当好转之际仲遇上母乳妈妈至惊嘅乳腺炎﹗佢接受香港01访问时话：“有一边完全塞晒发烧又泵唔到﹗”

Coffee因为鲠鱼骨入院，为咗保持奶量都有定时泵奶，但都系难逃出现硬块乳腺炎之苦，佢话：“话说琴晚2点几痛醒咗，不过系个胸。有一边完全塞晒，跟住发烧又泵唔到出嚟，我真系未试过咁样。我谂系因为我系全埋身突然转泵，唔够瞓又情绪差，跟住完全瞓唔到，系咁自己按呀推呀泵呀，之后瞓著又痛醒。”

根据卫生署网页所指，乳腺炎系因为乳管阻塞引起，会感到硬块非常疼痛、红肿、发烧、或感到异常疲倦等，初期系无细菌感染，继续喂哺母乳让乳汁流通，系治疗乳腺炎嘅重要方法。相反，如果停止喂哺母乳嘅话，乳管会继续阻塞，就有机会细菌感染甚至形成脓疮。相信Coffee正因为住院兼打咗麻醉药，囝囝未能埋身吸啜导致今次情况。

27号早上Coffee接受香港01访问时话：“而家好返好多啦已经退咗烧，胸都无咁肿痛啦，催乳师话好在我未严重到有脓，但仲系感觉比平时胀痛。之后等麻醉药过晒，勤力啲俾囝囝埋身，应该就会无事啦。”由入院后Coffee就不停更新IG，除咗身体痛楚，见到囝囝唔肯用奶樽饮奶更令佢相当心痛，果然做咗妈妈后所有心思只会挂住囝囝。好在27号下昼佢终于可以出院，唔使再母子分离啦。