容祖儿称希望胜利冇事被围插　急澄清：不接受不合法不道德行为

韩国天团BIGBANG成员胜利，因涉及性交易等丑闻，3月11日透过Instagram宣布退出演艺圈，亦正式被警方立案变成嫌疑人。原本胜利嘅工作全面刹停，包括原定来港出席昨晚举行嘅《KKBOX香港风云榜颁奖典礼》，与容祖儿合唱新歌。Joey被问到胜利一案时，因为一句说话搞到被网友围攻，要急急发微博回应。

Joey喺2月12日发文透露同胜利录制新合唱歌，原来昨晚会首次同台演唱，点知遇上呢次性丑闻风波。Joey颁奖礼后接受传媒访问时讲咗句：“自己都好期待同佢合作，呢刻希望佢快啲冇事。”点知就系因为呢句回应，引嚟唔少网友炮轰，话胜利呢次涉及咁严重嘅案件仲希望佢无事，相当无知兼有助纣为虐之嫌。

相信Joey都估唔到一句说话引起轩然大波，佢喺13号中午马上发微博澄清立场：“一直忙于排练，听说发生了事情，但不知道已经发展到这么严重。访问引起大家误会，十分抱歉。对于任何不合法不道德的行为，我是绝对不接受、不认同、不支持的！以后我也会更加关注时事及谨言慎行。”