谢安琪生日前夕险表演失准　张继聪撑爱妻：灾难系坚不过你更坚

撰文： 洪晓璇
出版：更新：

3月13日系谢安琪42岁生日，不过今年嘅生日礼物真系一世难忘，佢昨晚以“风云大使”身份，现身首届《KKBOX香港风云榜颁奖典礼》兼演唱5歌曲，点知演唱第一首《罗生门》时，观众已发现KAY表情有异，原来佢嘅耳机失灵，全晚靠自己执生完成演出，更喺后台泪晒当场。老公张继聪睇到都相当心痛，漏夜于IG写下长文力撑爱妻：“灾难系坚嘅，不过我认为你更坚﹗”

谢安琪于《KKBOX香港风云榜颁奖典礼》面对耳机失灵，感到相当徬徨。（叶志明摄）
张继聪于IG写下长文力撑老婆。（张𫄶聪IG）

KAY演出后接受访问时，表示入行多年第一次遇到咁严重情况，极度徬徨但只能尽力演出。老公张继聪喺IG写下长文话：“知道你为咗依个演出，花咗无数嘅心血去练习再练习，希望做到最好。可惜Live performance 永远有无限嘅意外会发生，而今次发生嘅意外，系歌手最恐惧嘅一种……耳机失灵。依种情境，任何表演者发梦遇到都保证会吓醒，不过，可惜，今次单嘢系坚嘅。依二十分钟嘅痛苦，恐惧，㥬惶，心血白费...对表演者嚟讲，系灾难。灾难系坚嘅，不过我认为你更坚。”

Kay接受访问时表示好感谢Supper Moment Sunny帮忙，专登企到好近等佢睇到咀形知唱到边。（叶志明摄）

“咁嘅环境，你仍然奋力完成整个演出，冇放弃任何一粒音任何一个小节。The Show Must Go On，系一个表演者嘅专业。个骚你唔止go on ,仲充满勇气咁完成。大佬，听唔到声照唱，部琴冇声照弹，听唔到音乐数唔到拍子照入歌㖞，真系靠心中有剑。意外冇人想嘅，不过你好叻。同埋今次之后，可以更加胆生毛啦，上到台冇嘢惊㗎啦﹗经历系用嚟强化自己嘅 。312，个宇宙预早送依份礼物俾你，等你再Level Up ,算系咁啦。最后最后Happy Birthday My Lady 313。”有老公嘅无限量支持，相信Kay一定好心甜，亦好快会振作起嚟﹗

+3