【开心速递】陈荣峻疯狂突破　56岁有新挑战：冇谂过配角咁多嘢玩

专业废青金城安(周嘉洛饰)继反转律师律后，喺昨晚（3月4日）嘅《爱‧回家之开心速递》又一新力作，事缘安仔女友Bonnie（林凯恩饰）爸爸谭道德（陈荣峻饰）为报答根叔（刘丹饰），誓要一改金城安“废青”态度。谭道德要求安仔到其家中修练，并要佢抄写《道德经》，但废出天际嘅佢竟然将经文跌到一街都系。

谭道德为咗“收经”搞到身水身汗，返屋企洗澡完毕，发现无拎毛巾同衣服，以为安仔同老婆都出咗去执《道德经》，于是赤裸裸咁行入睡房，谁不知，原来安仔喺客厅做直播，谭道德即时成为网民口中嘅“肉虫”，结果一切有如谭道德所讲：“怒令人失去理智”丧闹安仔之余，仲连“打靶仔”都出埋……

陈荣峻接受访问时笑言为《爱‧回家之开心速递》而有不少突破，当中包括全裸。“自己收到剧本时都觉得好笑，其实之前有集‘道德训练营’同埋‘道德后遗症’，我要扮后生女，又要自拍又要内八脚，最后仲要咀埋安仔，萤幕初吻嚟架，比个靓女我就话啫。”陈荣峻透露废青金城安将他所有潜能都激发出来，包括之后的rap。“求婚都无咁紧张同大压力，拍咁多年戏未试过咁紧张，紧张到连导演都睇得出，因为自己连歌都唔系好识唱，但竟然学rap，好在老婆教我数拍子。”

陈荣峻透露谭道德虽然系固定角色，但由於戏份唔算多，所以令佢有更多时间去塑造，就好似昨晚一集，追打安仔时那个怒发冲冠的造型也是他构思出嚟，之后对著家长解释全裸系因为被移花接木时，手按著心口其实系想表示揜住良心，如此用心，陈荣峻只望观众钟意。“自己都估唔到处境喜剧可以咁开心、咁多嘢玩，就算唔系主角都可以咁有发挥。”他更笑言如果之后加重戏份，继续有突破的话应该随时“死得”。