10亿千金黄文意未受减薪潮影响　转做无线亲生女：价钱好满意

因《3日2夜》而成功吸晴嘅黄文意（Mandy）过往虽然参与过唔少剧集拍摄，但戏份唔算多，不过，相信接下来情况将会有所改变，因为黄文意已经由无线合约艺员变成亲生女。佢接受访问时透露合约刚签无耐，为期5年，至于点解会被转做亲生女，黄文意就话自己都唔清楚，更笑言因为太开心，所以未有过问太多，至于价钱方面，佢就话：“OK架，我自己都好满意，系开心价。”

黄文意自2016年加入无线后，拍剧之余亦做过娱乐新闻主持，不过，令佢火速为人所熟悉一定系《3日2夜》以及绯闻男友唐文龙。问到成为亲生女之后会倾向哪一方面发展，黄文意表示一切交由公司安排。“因为有拍过剧亦都有做过主持，所以唔系太担心，觉得都可以应付到。唯一的隐忧就系个样生得太细，所以有留长头发，希望适合成熟嘅角色。”至于会否发生“封胸”情况呢，黄文意就只系话“性感唔系好适合自己”，即系都可以继续性感啦！其实除咗幕前外，黄文意亦有修读香港大学嘅文学硕士，她跟无线签约时亦表明希望尽量不影响学业。“每星期有两堂，影响就应该唔会好大，希望公司比多啲嘢我做啦。”

其实黄文意除“最强Body”外，其家底亦十分吸引，有指黄父在内地经营LED生意，公司发展得甚有规模兼上市，身家保守估计逾10亿。对于“10亿千金”呢个称号，黄文意就话好有压力，并谓“我好怕啲人assume啲钱系我，我只系一个穷女艺人同学生，手上拥有嘅资金都拎咗去做生意，自己都好好奇到底10亿系点计出嚟。同埋其实盘生意唔止我爸爸，仲有其他亲戚架。”原来系家族生意，即系随时唔止10亿?!虽然黄文意口口声声话自己穷，但佢每月都有俾家用父母。“因为之前做主持，再加上外面嘅job，所以收入都唔错，养活到自己，比家用唔系好多，可能都系够佢哋食饭饮茶，不过爸爸妈妈都明白嘅。”而喺同公司签约前，黄文意亦有与父母商量，并得到支持。“希望我做艺人之余，亦好好充实自己，好似朱千雪咁，读一啲专业课程。”