容祖儿变闪粉人拍《一种永远》MV　重温入行20年片段：好感动

今年系容祖儿入行二十周年，全新广东主打歌《一种永远》MV终于正式曝光，佢希望透过全新歌曲迎接今年年中嘅演唱会。《一种永远》正正呈现祖儿当下嘅心态，特别喺歌词方面，令祖儿回想起坚持二十年嘅梦想历程，“喺呢个过程里面要经历过唔同嘅磨练、长大，都系唔容易，我唱呢首歌嘅时候都系有一种激情，同埋希望自己可以飞得更加远、更加高的感觉。”

MV于台湾拍摄，导演揾嚟曾夺得台湾金曲奖“最佳音乐录影带奖”嘅比尔贾操刀，佢希望祖儿有一个“超现实”嘅演绎，而祖儿就希望出嚟嘅效果除咗画面靓，仲会以一个故事形式带出佢一路走来嘅经历，祖儿话：“导演谂咗个超现实嘅故事、一啲穿越嘅感觉。MV一开始有个小妹妹，喺好耐以前灌溉一个音乐嘅种子，将好多心机、心血摆喺泥土入面；而我系未来嘅人，回到过去，然后就同个小妹妹有啲交流。”

拍摄当日，祖儿除咗要着住一件重量级嘅珠片衫，仲要全身搽满闪粉，搞到佢成个人硬晒，佢笑说自己好似一只着咗鞋嘅狗仔：“因为我要黐啲闪粉落去两条手臂，好‘立’，好多唔同层次嘅闪粉，个头又落咗好多gel，条裙又好硬，所以我而家就好硬，哈哈。另外仲有一个shot好似验眼，又系要我成个人硬晒定晒，哈哈。”

拍完第一个shot后，祖儿已经劲感动，仲话回忆番晒嚟：“导演安排咗一个好大嘅圆台，其实个圆台系一个LED mon，佢将我咁多年嚟嘅一啲经典MV放咗入去，因为我呢只歌系希望带出一种回顾、亦都系对一种未来的展望的一种心情，所以拍摄嘅时候佢播一啲旧嘅片段，当我见到呢啲片段时，脑里面谂起好多好怀念嘅画面，好感动。”

【周五心意运动】您捐一封$50利是，已可为基层送上温饱，01心意呼吁您支持【香港青年协会】 ，每$50即可制作5碗爱心汤和心意礼物：https://heart.hk01.com/zh/project/10095