【开心速递】细龙生龙太入晒屋　陈伟琪郑世豪终于有代表性角色

无线处境剧《爱‧回家之开心速递》向来受到观众同网民喜爱，最高的单集收视更有30.5点，令全个剧组都非常欣喜，珍姐 (无线电视戏剧制作助理总经理曾励珍) 早前已宣布添食加拍至720集，有望挑战《真情》的1128集。在剧中饰演细龙太Jenny的陈伟琪 (Vicky)，以及细龙生Max的郑世豪，对于该剧可以Keep住有得添食当然都好开心啦。两人异口同声表示收视报捷令他们感到好鼓舞，希望长做长有，向1129集进发。不过踏入2019年无耐，该剧有不少角色都相继被离开，先后已有博士 (马贯东饰)、Mandy (谢芷伦饰) 以及傻强 (冯奕森饰) 离开了剧组，问到Vicky同世豪可会怕无得演落去，他们坦言无得惊的，作为演员只能做好自己本份。

两人在剧中饰演夫妻，而在戏外Vicky亦会叫世豪做老公，十分老友，难得世豪的真人老婆并不介意，好明白和尊重他的工作，Vicky也好感激阿嫂，笑言：“多谢阿嫂借个老公畀我。”原来当日Vicky与世豪首次于该剧合作拍的第一场戏就要咀对咀锡锡，世豪说：“原本以为导演系就镜头，点知埋位拍时系要真锡，仲锡咗好多啖，拍完呢场戏我就请佢食下午茶，食完我太太就到喇。(太太嚟监场？) 唔系，系咁啱我𠮶晚约咗我太太。”他又大赞太太大方唔会呷醋。

剧中细龙太不停畀绿帽细龙生戴，不少剧迷都好关心到底细龙生几时先会醒，对此世豪说：“由我开始娶咗呢只嘢之后，我个人就蠢咗好多，几时会知就真系唔知，应该暂时都唔会发现㗎喇。”Vicky就表示：“其实细龙太同细龙生之间系愈嚟愈有感动位嘅，我成日问编审会唔会最终都系拣返佢。其实细龙太依家偷情嘅次数已经少咗㗎喇。”她又好感恩可以演到细龙太这个角色，感谢编审将她写得好立体，完全有别于以往只是收性感示人的角色：“以前我演嘅角色净系得一面，而呢个角色就有好多层次，畀我试到好多唔同嘅情绪。”

细龙太在剧中都算是个奸奸地的角色，Vicky庆幸自己出街无畀人闹：“真系无人闹，反而大家都几钟意呢个角色，喺街度都会有人叫我做细龙太，我会好开心，觉得个角色被认同。呢个算系我入行以嚟最具代表性嘅角色，我挑战咗好多演戏上嘅新尝试，初初都会拿揑唔到自己嘅演技，要慢慢去揣摩。”她又为细龙太辩护：“佢有时都几惨，有返应得嘅报应，同埋奸得嚟有时都几搞笑，佢都有有情有义嘅一面。”演了这个角色后她亦多了工作机会。

世豪亦表示细龙生是他从影至今最具代表性的角色，出街总会被人叫他“细龙生”“Max”又或是“大少”，他说：“真系令到香港广大市民都认识咗我，好入屋同入心，自己都恨咗演处境剧嘅角色好多年，终于畀我恨到可以加入《爱‧回家》，成个制作团队都好认真好团结，好似一家人咁，好开心。”他亦好希望可以与Vicky以荧幕情侣档姿态在外接Job揾真银：“早前啱啱有第一个我哋一齐接嘅Job，希望嚟紧会愈来愈多呢啲机会，可以一齐去赚下外快啦。”

至于往后的剧情发展，虽然他们都表示一切看编审的安排，但世豪就发表了他的个人预测：“最好细龙生同细龙太就生返两个，不过唔好系黑人BB，相信如果生咗小朋友会有助佢哋两个争夺继承权，所以嚟紧嘅剧情应该系斗快生B。同埋其实除咗同长房争，仲有三房，有个叫阿Joe嘅仔仲未出场。”而现实生活中，世豪也好钟意小朋友，与太太结婚5年的他，都希望可以生个猪BB。他说：“会努力尝试，都要顺其自然。”

一齐睇下Vicky同世豪嘅靓相啦！

【周五心意运动】您捐一封$50利是，已可为基层送上温饱，01心意呼吁您支持【香港青年协会】 ，每$50即可制作5碗爱心汤和心意礼物：https://heart.hk01.com/zh/project/10095