【荷里活有个大老千】Babyjohn被TVB Out出宣传 靠自己喺IG造势
撰文： 洪晓璇
出版：更新：
王晶监制嘅新作《荷里活有个大老千》，紧接《大帅哥》后播出，由郑则仕同汤镇业主演，而BabyJohn蔡瀚亿亦有相当重嘅戏份，可惜因为佢份属萧定一旗下，公司同TVB官司纠纷影响，BabyJohn亦步张继聪郑欣宜及周秀娜后尘，剧集出街宣传完全无佢份。虽然官方宣传唔预佢，但BabyJohn都有喺自己IG落力宣传，一尽演员责任﹗
《荷里活有个大老千》以60年代作背景，BabyJohn饰演嘅舒奇，可以话系向当年《难兄难弟》饰演李奇而夺得视帝嘅罗嘉良致敬。BabyJohn今次除咗参考六十年代怀旧片，亦坦言有参考罗嘉良演出。蔡瀚亿话：“呢部戏有好多搞笑位好攞胆，头段有好多生活上嘅搞笑情节，去到中段就多凄凉位，基本上愈拍愈惨，所以中段我每次去到片场，情绪都好波动大上大落。我个角色系钟意赌，但冇因为呢次拍戏而去学，因为角色有名你叫─‘舒奇’，唔输就奇，学咗有机会赢，唔学就一定输，keep 住输就得啦。”
扮“舒奇”必有笑点，但镜头后喺内地拍《荷》剧时，日日咸鱼生晒，由底湿上面变干再湿再干，又咸又臭又黐立立真系相当难顶：“我哋喺一个 38 至 40 度底下嘅铁皮厂拍摄，太阳晒落铁皮嘅热力直接射入室内，每次我一落车一入片场化妆间𠮶吓已经热到底裤都湿埋；我有个造型系着三件头，有次去室外拍嘢，真系好热，得一把大排档风扇，我就坐埋去，瞇埋眼自我催眠，话俾自己听唔热、冻架，但工作人员见我唔郁以为我中暑，系咁攞水俾我。𠮶种热嘅状况，其实系令人感觉喺中暑边缘。”
以为返酒店开大冷气可以叹吓，结果冷气同样热到晕，BabyJohn话：“酒店个冷气机好奇怪，装喺窗边，冷气系吹落个窗度，但太阳直射个窗，结果间房都好似冇冷气，而个冷气机到咁上下就滴水，系滴到好似瀑布咁，好多呢啲情况系我见都未见过。”