【大帅哥】监制徐正康分析点解有胶剧 “太例牌冇心思咪胶啰”
“网友话无线拍紧胶剧！你点睇？”
为何要问《大帅哥》监制徐正康这个问题？首先要了解拍剧只是他的副业，他正职是制作部助理总监（戏剧制作），主要职责是提升整体剧集质素，简单来说，监制要开拍新剧，先要过他这一关，徐正康会为新剧开拍前“把脉”，剧本需要什么元素？演员配搭？如何有最大成本效益等。
徐正康有留意网民的意见，当然认识谬剧这名词，他说：“我会同啲监制、编审、编剧分享，点解人哋会话我哋呢部系胶剧呢？你哋有冇检讨下？系布景呀、画面定系演员carry唔到个角色？定系剧情太例牌？”
正视网民反应
徐监制应该对胶剧的认识不浅，更懂得根治方法：“胶即系好似“啤”出嚟咁，冷冰冰，观众完全冇feeling，剧集胶唔胶嘅定义，就系你将啲戏剧元素展现得唔好，咪变咗胶啰，剧情太例牌咪胶啰，点解剧情描述我哋唔花多啲心思呢？譬如你写感情线，网友实话系啦，一定三角恋，就算你真系用三角恋，你系要令观众觉得估唔到咁出现，咁咪唔胶啰。”
一切因为港视
徐正康很想改变观众对无线剧的观感，除了因为网民讨论区的意见，亦因为王维基：“自己有个心结，王维基年代，唔知点解我哋呢到过去嘅人，就突然被高高捧起，留喺TVB嘅就系无用嘅，我念大家都感到当时嘅气氛，我觉得唔系好公平，我觉得无线都有好认真又出色嘅台前幕后，当时揾我返嚟，责任大咗，亦想我帮手提拔啲新嘅监制。”
无线剧爱用感情线拖戏？
难得同高高层访谈（监制已是高层），当然想将网民意见带给他，除了胶剧外，大家觉得无线剧爱用感情线填充集数，有时亦会觉得是因为无线剧横线播映，加上集数多，只好用主角爱情线去拖集数，但徐正康对这个说法有保留，“点解一定要讲感情？sorry感情线系戏剧元素其中一顶嚟，一定要存在，但如果观众觉得冇内容，咁就出现问题，但如果条感情线系有理由地变化，咁就冇问题喇，我唔觉得系长度问题，甚至以前《男亲女爱》DoDo同子华，其实潜底嘅感情线一直进行中㗎，但观众睇咗100集唔会觉得痳烦...但如果你写得冇心思，观众已预知你下一集变化，佢哋就会觉得你喺度拖㖞，但如果你写得好，令观众好投入嘅感觉，主角爱几多场戏都冇问题，因为佢哋好想睇落去。”
惯性收视不是绝对
无线惯性收视优势持续，就连网络亦雄霸，单看Google每年热搜，无线剧集名字占了一半或以上，就知入屋程度有增无减，作为高层大可坐视不理，但徐正康知道不单止网民，就连员工感受都很重要“以前听到无线嚟拍剧，真系斟埋茶俾你㗎，而家？你唔好阻到佢揾食呀，快啲拍完呀，时代唔同咗喇，观众选择太多，唔一定睇你㗎；除咗观众，员工一样要有满足感，如果我哋出嚟嘅作品，收视好，社会效应强，员工自然会兴奋啲，包恬我自己都系会更积极去做，成间公司会向好啲。”