【叱咤2018】古天乐台上疑似爆粗　拉埋其他歌手合唱《男朋友》

《2018年度叱咤乐坛流行榜颁奖典礼》昨晚（1日）圆满落幕，古天乐以大热姿态，凭住与谢安琪合唱嘅半首歌《(一个男人) 一个女人和浴室》，夺得“叱咤我最喜爱的男歌手”奖，众望所归，成为全晚焦点。古仔昨晚唔止开金口唱歌，更疑似在台上唔小心爆粗。

见到古仔得奖，而佢又咁畀面出席，大家最期待嘅当然就系佢开金口唱歌啦！佢又点会唔知大家谂乜，不过佢上到台都仲系想避吓，叫林海峰（Jan）搞吓气氛过场就算，阿Jan话：“唔好玩我啦，系咪要玩呀？”古仔依然想推：“11点几㗎喇㖞，就嚟12点啦……”阿Jan继续无视古仔：“唱歌吖！”知道避无可避，古仔笑住好自然咁讲咗句：“X！嚟，唱啰！”随即叫埋容祖儿（Joey）、谢安琪（Kay）、张敬轩同麦浚龙（Juno）上台一齐，因为呢班人系推佢上台嘅“幕后黑手”。本身Juno 仲点唱《今期流行》，古仔打咗个突，话“不如唱啲温和啲嘅歌”，轩仔提议唱佢嘅首本名曲《男朋友》，Joey 仲好醒咁即刻入歌，成功迫到古仔开金口。

不过亦有网民表示听到古仔讲嘅系“挑”，而唔系粗口的“X”，不过无论如何，古仔都可以话系乐坛史上，第一个“钟意唱歌但唔钟意上台唱歌”嘅“叱咤我最喜爱的男歌手”。