【新城劲爆．专访】锐哥“分猪肉”有原因︰曾度身造奖畀陈伟霆

今年Boxing Day（圣诞节翌日），一班歌手仍然没有收到任何礼物，事关一直最多奖项、被讥为“分猪肉”的《新城劲爆颁奖礼》，与上年一样在12月29日（今日）举行，而奖项数目亦不复改制前一样多，仅得60多个，不及高峰期163个奖的一半，未必人人有份、永不落空。“乐坛太公”继续不再分猪肉，分，都系分半肥瘦猪肉。

2002年接手、将《新城劲爆》打造成被外界视为“分奖典礼”的新城前台长朱明锐（锐哥）接受访问时，便指眼见颁奖礼自2016年改制，感觉有点心痛：“改咗制之后佢哋尝试玩口味，但你本身系一间音乐推动力唔够强嘅媒体，去学人玩口味，而主持嘅又唔系一班对音乐有影响力嘅人，系唔会做得出成绩，只会两面唔讨好。”即是最好返回旧制？锐哥直认：“我觉得做返一个Party咁就最好，容易控制，嚟紧人又会开心啲，而家系做唔返𠮶承接嘅影响力。”

作为一个派对来说，过往的《新城劲爆》绝对称得上是成功的，所有歌手、制作单位、唱片公司，如无意外，都是笑住前来笑住离开。不过，作为一个颁奖礼，就好可能不够性格、不够“含金量”，而其实当初锐哥都质疑过自己是否在做对的事，他在“猪肉奖”这称号首次面世时，便拿着相关报章杂志，向当时上司甘国亮负荆请罪：“我问佢，我系咪闯咗祸，搞到《劲爆》个江湖地位唔够高，佢就话唔好咁谂，如果我哋畀而冇人拎，就系滥发；我哋畀而佢哋盛装出席，就即系都认同呢个奖喺乐坛上有一定位置。”

其实我哋（新城）系商营机构，《劲爆颁奖礼》得到客户支持，差唔多所有嘅唱片公司都支持我哋，派巨星、派新人出嚟，即系认同呢个颁奖礼，咁样就已经足够。

真的不介意《新城劲爆》被冠以“猪肉奖”这个嘲讽味浓的称号？锐哥就话自己平衡到各方压力：“你话我猪肉奖，我可以话你（《咤咤》）闩埋门、净系得某啲DJ嘅喜好，你话点就点，完全唔理街外系点分析。”

而这个答案亦点出了《新城劲爆》奖项繁多的原因之一──香港乐坛的流行趋势：“我接手时只系想反映事实，唔想有太多专业意见、个人喜好，我系想畀大家知道边啲碟系卖得、边啲演唱会系多人睇。”锐哥承认当时的确是几乎是人人有份，但不同奖项所代表的，其实是有分别：“老实讲，𠮶啲细奖都系一种鼓励性质，大家心知肚明，但大奖全部都是反映当时嘅流行趋势。”

讲真的，《新城劲爆》的奖项数目确是夸张，在2012年时派出了163个奖，纪录至今无人能破，而奖项的名称五花八门，有“演绎大奖”、“人气歌手”、“跃进歌手”、“流行爵士歌手”等，确令观众大开眼界，锐哥便指谂奖项名不算好难，因为不是完全凭空想像，个个都有根有据，只是有少少巧立名目：“我好记得，当时（2008年）好想鼓励陈伟霆，因为佢外型好好，佢唱片公司（英皇）亦都好想畀机会佢，当然都有好多人攻击佢，话佢跳舞嘥气，又笑佢‘的士陈’，但我就唔系咁睇，我觉得唔应该苛刻批评佢，就开咗个跳唱歌手（按：实为新城劲爆跳舞歌曲）畀佢，虽然系巧立少少，但其实都好贴身。”

至于“新城全球劲爆歌手”这个超级大奖之所以出现，原来都有段故事，锐哥说：“当时刘德华肯嚟，但陈奕迅又喺度，唯有谂多个全球劲爆歌手，然后畀刘德华，你问陈奕迅高唔高兴，其实佢系心服，论全球影响力，一定系刘德华最好；论唱功、论原创力，就一定系陈奕迅最好，佢拎劲爆男歌手系啱嘅，对上一级就系全球劲爆歌手，咁5年后陈奕迅都拎到啦！”

如果叫锐哥私人畀奖，到底今年哪一个歌手、哪一只专辑、歌曲最获得其青睐？他坦言陈奕迅的《L.O.V.E》必定是年度最佳专辑：“佢里面首首都系小品，好襟听，我自己就最钟意《渐渐》。”记者笑他今次终于忍到手只“颁”一个奖时，他便说：“咁我都好钟意容祖儿嘅《心之科学》嘅，佢嘅演绎方法绝对称得上大姐级，好有风范，系香港嘅Pop Queen。”