【武藏全传．专访】港产佳作可一未必可再　欧锦棠：局面好难扭转

由徐天佑、欧锦棠主演的舞台剧《武藏全传 决战岩流岛》将于1月中、在上环文娱中心上演，两位主角现时正在密锣紧鼓地彩排。讲起2013年公演的前作《宫本武藏》，欧锦棠接受《香港01》访问时便指数年前的演出是“前传”，而今次则会将日本剑豪宫本武藏的人生浓缩，并为其下半生添上注脚：“上次我做武藏，今次我做佐佐木小次郎。（点解会转咗？）因为好难揾人，小次郎要好有个性，本身谂住继续做武藏，谂谂下就觉得可以自己做小次郎，再揾人做武藏。”但其实武藏的人选亦不易揾，要演得到起初愤世嫉俗的废青味，同时又要扮得到中后期得到人生启示、贯彻自己武道的感觉：“一开始都唔知揾边个做好，有一日突然谂起徐天佑喺片场同我打招呼个样，再揭一揭井上雄彦本《浪客行》，就觉得宫本武藏就系佢咁嘅样，件事好漫画！”

到底欧锦棠觉得自己似武藏定小次郎？他坦言好多香港人都是表面是小次郎，心里面是武藏：“小次郎份人好简单，佢就系想威、炫耀自己，想扬言立万，但系佢哋内里都有颗赤子之心。”

而其实欧锦棠亦有一颗赤子之心，好想为香港的演艺出一分力，希望可以提升整体质素，但奈何好似甚么都改变不到：“我思考咗好几年，呢个局面维持咗好耐，而且每况愈下，唔系冇好作品出世，但系点解我哋业界个水准仲系咁，原来好多嘢都系相辅相成，当成个业界都系市场化时，好多嘢都要将货就价，最后令个水准只得咁样。”

好多观众都归咎于演员功力不足，同时盛赞外国水准高几皮，是香港不够人学，不够人教，还是教和学都不够专业？对此，欧锦棠觉得多方面出了事：“有时候有啲新演员做得唔错，观众、传媒就会不断追捧，赞佢做得好好，但系点样好呢，佢哋又唔讲清楚，咁呢种称赞系可以累死呢个新演员。”他又指有时候新人觉得自己接了一个有所突破的角色，便代表自己有进步亦是有问题：“做完之后，接到广告、商演就得，但唔会咩叫深层次演技，因为呢度唔需要深层次演技。”

在欧锦棠眼中，香港已经沦为一个做足基本嘢便获得赞许的地方，一个非常古怪、扭曲的地方：“有观众见到个演员话喊就喊就觉得好犀利，但其实呢啲只系基本嘢。香港真系一个唔需要深层次演技，老板一开始净系会问有冇打戏，冇打戏冇人睇，我唔系话香港冇高质制作，有，但佢哋好挣扎求存，有啲做到好成绩，但唔知仲有冇第二部。好难扭转呢个局面，你睇睇香港呢个社会，个个人都系想最短时间内得到最大功效，换句话讲即系钱，个个都系想最快回本，不会花时间用心做制作。”

所以，欧锦棠觉得累了，之前更在访问中承认有移民的想法：“唔系做舞台剧做到攰，系香港整体气候令我好攰，政治气候、生活环境等等，呢啲嘢都系窒碍我创作，我仲可以有咩创作突破自己，系呢啲令我觉得攰。”

虽然个心好累，但他仍然是好喜欢这份工作，好想继续做落去，又好想揾人帮轻自己和太太兼拍档万斯敏手：“揾人帮手又牵涉到支出，所以我哋只能用有限人手，唯有身兼多职。点样维生？维生到，我都有其他嘢做，讲衰啲，我做其他嘢都系补贴自己做舞台剧。”