木村拓哉开微博掘人仔　讲普通话同内地网友自我介绍

木村拓哉近来频频到海外掘金，虽然近期人仔汇率麻麻，但话晒都系强国，又点能够忽视呢！日前木村拓哉就飞到上海出席手表品牌活动，由于木村上一次去上海，已经系6年前以SMAP成员身分去录影春晚，今次单拖到内地揾金银，难怪佢心情大靓，有同佢同机嘅乘客，更得到男神亲笔签名。

木村飞抵上海后，第一件事就系开通微博，虽然未有传任何照片或留言，但就火速得到新浪认证，而粉丝罗志祥，亦留言同偶像“打招呼”。活动上，木村虽然话中文好难，但就频频大骚功力：“很高兴来到中国，我的中文好吗？”
 

出席完活动之后，终于喺微博供献出第一次，以中文同内地粉丝打招呼：“大家晚上好，我是木村拓哉，我开通了微博，请大家关注我，谢谢。”最后仲附上一个迷人又倾心嘅笑容。而今早（23日）再次发文，并以中文留言“早上好！”同“下次见！”虽然两个po都系得几粒字，而照片亦都见唔到木村型样，但就已经有过万回复，当中更不乏以日文留言。如果大家有玩开微博的话，相信都会留意到一众艺人使用嘅手机型号，因为只要发文，就会显示使用者嘅手机型号，而木村竟然仲用紧iPhone 6s Plus！真系估佢唔到。

其实Johnny's事务所一直对选下艺人嘅肖像权十分紧张，多年多严格执行“互联网上不得刊登或使用旗下艺人照片”，直到近年才慢慢解禁，不过要咁高调开微博甚至系拍片，相信只有木村拓哉可以做得到。