郑希怡带囡囡梁浸浸现身警署　容祖儿关智斌助出重酬寻失物

郑希怡嘅囡囡梁浸浸，天生曲发相当可爱，自出世起已经风靡唔少星级UNCLE AUNTIE，容祖儿谢霆锋TWINS等锡到佢㶶，妈妈YUMIKO都乐于带住个女周围去周围玩。点知呢日两母女忽然去到警署，又唔系学校去参观，到底咩事呢？

时间线要推返去5日前，大家都知容祖儿出名大头虾，电话银包跌过无数次，原来Yumiko都不遑多让，佢喺IG上载一个桃红色银包相片，留言话：“遗失银包一个，有人执到吗？可以要返d卡吗？无限感激。”网友纷纷留言问线索，但Yumiko对自己几时边度遗失都毫无头绪，网友不禁笑问：“究竟有无拎出街？不如问下浸浸姐先。”关智斌容祖儿都出力呼吁，Kenny话出一千蚊重酬，Joey居然话送出“谢霆锋猪扒包一个”相当有创意。

大家可能谂，唔见咗呢个名牌银包，揾到机会都应该好微啦，但Yumiko就带来好消息：“奇迹出现了！收到银行电话，遗失的已在警署，多谢好心人。万分感谢，想多谢个好心人，警察说那是不能说的秘密。奖金不知如何比你，因为关智斌话会重酬你，容祖儿会请你食谢霆锋猪扒包，就系成日都卖晒𠮶个包。”Yumiko仲笑言揾返银包都不及梁浸浸开心：“亚浸都好开心，终于有得去police station，佢话呢度系警察的屋企，系咪有床架，夜晚系咪一齐训系度，下删100个问题……”