【飞虎】黄宗泽拍戏夹断脚掌变“跛Co”　苗侨伟吴卓羲轮流探望

拍戏时遇上危险场面，除咗一定会做足安全措施，有时要靠后期制作增添视觉效果，唔通拍跳楼戏真系要个演员跳楼咩。不过意外嘅嘢无人想，最近连续几位艺人拍戏受伤，呢次就轮到正在拍摄邵氏网剧《飞虎之雷霆极战》嘅Bosco黄宗泽。

12月13日踏入38岁嘅Bosco，最近正忙于拍摄《飞虎之雷霆极战》，点知呢日就上载瞓喺病床左脚打石膏嘅相片，原来日前拍摄一幕动作场面时，Bosco不慎夹伤左脚脚掌搞到骨折，要入院做手术。Bosco留言话︰“虽然拍摄时出了意外，但是请你们放心，手术非常成功，我会专心养伤，用最快的速度回归大队，报答你们对我的爱！”

话晒今个星期系生日周，当然一早有唔少庆祝活动，但通通因为Bosco受伤而告吹。本身一班粉丝帮佢搞咗个生日会，寿星仔都无法到场，只能喺医院同佢地玩直播，show只“天残脚”俾佢地睇。好友们好似三哥苗侨伟、吴卓羲、乐易玲等都有到医院探望。