岑丽香大肚睇运动广告都喊：以为自己痴咗线

岑丽香日前在IG公布有喜，昨日（7日）出席活动，虽然已经有5个月身孕，但香香依然四肢纤幼，真系完全肥肚唔肥人。

香香早几日出席活动时已被发现有孕味，但当时佢否认怀孕，今日就为此解画：“因为好想当面通知亲戚呢个好消息，所以一直hold住唔认住，唔想佢哋睇报纸先知道消息，同大家讲声唔好意思。”

虽然本来已经计划好同老公过两年二人世界先生B，不过当香香同老公强强知道有BB时，依然非常意外，“其实我好迟先发现，呢半年成日飞，我以为只系时差觉得特别攰，觉得唔对路先去验孕，老公初头都唔信，不过大家都好开心。”至于BB性别，香香就话唔想知住，想保留惊喜，仲话男仔女仔都无所谓，BB健康就ok。

香香话自从怀孕之后，受荷尔蒙影响，情感好容易被牵动，“有一日老公开一个波鞋广告畀我睇，我睇睇吓，无啦啦流眼泪，竟然咁都感动，我唔知自己系痴咗线，定系荷尔蒙发作，每一步都好新鲜，每日都学习去面对。”