陈家乐原来做过外卖仔 唔够醒目被老板闹爆
撰文： 洪晓璇
出版：更新：
好多艺人都做过唔同行业，吸收经验帮助入戏又有，为生计做兼职又有，特别系要面对客人嘅工作，真系反应慢啲都出事。陈家乐入行多年，今年总算开始有收成啦，呢日拍摄广告时要扮侍应，令佢不禁想当年，原来佢都做过外卖仔﹗
“你唔系外卖仔﹗”即使好戏如周星驰，都未必驾驭到外卖仔身份，大家可能觉得拎住份外卖文俾个客，收钱返公司就完成任务，但家乐就分享返，其实当中都好考应变能力架：“以前其中一份暑期工系喺茶餐厅做外卖仔，有一次踩单车送外卖，踩到中途突然炒车，啲奶茶倒泻晒，得番一半，但𠮶阵时劲白痴，唔识得返去茶餐厅斟过杯，就咁将𠮶半杯送去俾个客，跟住个客打去茶餐厅投诉：‘点解得番半杯？’，老板仲以为我自己饮咗，哈哈。”
家乐原来同餐厅工作者都相当有缘份，除咗暑期工，佢仲即时谂起细个同妈妈去连锁快餐店食嘢，俾女侍应闹到喊嘅往事：“妈咪行开咗，我自己坐喺度食，但食到劲污糟邋遢，跟住有个姐姐走过嚟：‘小朋友，你唔好食到咁污糟㖞，你咁样唔啱㗎㖞。’我听到就喺度喊，妈咪返嚟后问我乜嘢事，我话个姐姐话我食得好污糟，妈咪话：‘啱呀！人哋咁话你系啱㗎！’然后个姐姐就过嚟同我妈咪讲唔好意思：‘搞喊你个仔。’妈咪话：‘你啱呀！你闹佢啦！佢真系好污糟邋遢㗎！’自此之后就好记得食嘢唔可以整到张台污糟邋遢啦。”