张卫健经典作品点止《西游记》　有角色竟同“小便”有关？

《大帅哥》都未播出，主角张卫健就已经有份角逐“最佳男主角”，可见大台重视程度。张卫健虽然已经有近22年没有拍TVB剧，但佢早年嘅作品至今仍然令唔少观众津津乐道。要讲经典，《西游记》一定系首位，当年首集已创下44点收视纪录，从而被誉为改编作品中的经典，口头禅“Yo！使乜惊呀！”、“我系花果山水帘洞美猴皇齐天大圣孙悟空！”亦相信只有张卫健先能够演绎出神髓。而《西游记》作为蓝本而改编嘅《齐天大圣孙悟空》，亦可以话系张卫健代表作，再加上当时有谢霆锋、Twins、梁汉文、葛民辉等人演出，阵容强劲，“噼啪你个隆的咚啊！”、“型到跌渣！”亦成了当年嘅潮语之一。

除咗马骝仔之外，大家又记唔记得《哎吔哎吔亲亲你》呢首主题曲呢？92年嘅《我爱牙擦苏》，张卫健饰演嘅牙擦苏，同黎姿以及刘小慧发展出一段纠缠不清嘅三角恋，而除此之外，佢喺剧中仲同有林漪娸呢位童养媳，享尽齐人之福。

91年同温兆伦合作嘅《老友鬼鬼》，张卫健于剧中饰演烂赌交通辅警，为帮梁佩玲摆脱男友被陷害至死，死后因肾脏移植到温兆伦身上，之后每次只要温兆伦小便，张卫健就会出现。以题材嚟讲，《老友鬼鬼》喺当年都算新鲜，而张卫健于剧中嘅口头禅“咪当我Robert”、“我哋系醒字派嚟㗎嘛”相信大家都好有印象。

另外，唔知大家仲唔记得“凉风有信，秋月无边。亏我思娇嘅情绪，好比度日如年。我虽则唔系玉树临风，潇洒倜傥，但我有广阔嘅胸襟加强劲嘅臂弯。”呢句金句呢？01年无线外购嘅《小宝与康熙》，张卫健饰演韦小宝，既煽情又肉麻，周旋于林心如、陈法蓉、朱茵、张茜等人之间，而同剧仲有舒淇同郑伊健。
 

除大台剧之外，张卫健早前有唔少剧集都曾在亚视播出（外购剧），99年佢同恬妞主演嘅《少年英雄方世玉》为亚视取得最高26点收视，比《还珠格格》更胜一筹，“两母子”一唱一和如同活宝贝一样。