吴日言冒险催生诞女　拒无痛分娩经历12小时阵痛：好似发咗场恶梦

吴日言自宣布怀孕后一直洋溢幸福气息，但到中期仲发现有妊娠糖尿，要每日自行注射胰岛素控制病情，之前拎住一大樽数百个针头，真系睇见都觉得辛苦，妈妈认真伟大呀﹗11月25号系阿Yan 35岁生日，呢日佢仲宣布囡囡Beatrice出世啦﹗佢接受《香港01》访问时透露生产时好似来回地狱又折返人间一样：“经历12个钟嘅阵痛，感觉好似发左一场恶梦，但梦醒后我得到一份好大嘅礼物。”

阿Yan分享咗四张照片，见到Beatrice咀细细相当清秀，新手父母望住囡囡流露无限爱意。阿Yan接受《香港01》访问时话：“囡囡顺产出世重6.6磅，似边个呀？好似一日似我一日似老公哈哈。”其实Yan患上妊娠糖尿拣顺产生BB，都系冒住极大风险：“医生建议Bea系38至39周出世，可能有好多妈妈会选择开刀，一了百了。但系如果我唔试催生而直接开刀，Bea就连试顺产出世嘅机会都冇。即使我知道Bea有脐带缠颈问题，而催生都未必成功，甚至最尾我可能要食一个大全餐，但系我觉得去试总有机会，呢一种阵痛只有妈妈先知，我要好好记得佢。医生亦比好多信心我，大前提系BB安全为先。”

生仔十级痛，仲要无了期唔知几时先到终点令孕妇相当绝望，而阿Yan就劲，拒绝使用无痛分娩直接挑战十级痛楚：“入产房到BB出世，经历12个钟嘅阵痛，感觉好似发左一场恶梦，但梦醒后我得到一份好大嘅礼物。我冇选择无痛分娩，镇痛只靠闻笑气。老公一直在旁支持我，不停同我报告镇痛数字，镇痛指数达到127感觉好似死去活来，我这辈子都会记得呢个数字。”

“过了10小时，BB心跳突然跌落80情况并不乐观，，真系千钧一发，再过多几分数都未生出，就应该要开刀。我当时冇谂其他嘢，只系谂住用力用力，隐约听到一班医护人员嘅同老公为我呐喊，指导我忍气用力倒数10声。原来BB位置和脐带问题影响出生，不过最后医生嘅经验和果断为我顺利诞下BB，听到BB嘅喊声非常感动，不过我冇落泪因为我已经筋疲力尽。原来该刻我嘅血压指数好低，要喺产房休息两个钟。”阿Yan话生仔就好似跑左三次马拉松，全身肌肉都好痛好攰，不过母女平安一切都好值得。