汪明荃IG自创新玩法　潮爆TAG人方法陆浩明都即跟

之前有啲小学生喺街访中话：“Facebook系老嘢先用。”时下年轻人都已经转投其他社交媒体怀抱，IG系其中一个热门之选。唔少艺人都有开IG帐户，简简单单分享靓相加啲hashtag，又可以tag朋友方便share合照。汪明荃汪阿姐上个月都开咗IG 户口，佢仲发掘咗个新玩法，大家学嘢啦﹗

10月9号汪阿姐正式开IG，仲UPDATE得相当勤力，无论人在香港内地定出埠登台，几乎日日UPDATE新相，有时仲一日几个POST开户口短短41日已经有58个POST。早前佢出席保良局盆菜宴就发生件爆趣事件，成为网友热话。

汪阿姐当日有份上台表演，著上紫色闪闪背心裙近6吋高跟鞋，同一班小朋友载歌载舞。表演完后汪阿姐到台下就座食盆菜兼欣赏表演，影落唔少相放上IG同大家分享。平时大家POST相TAG人系用软件内置功能TAG对方帐户，但汪阿姐就发明新玩法：手写TAG人﹗朱咪咪蔡康年就咁写人名，而一班高官总理可能大家未必太熟悉，汪阿姐就好贴心咁，将头衔都写埋上去，真系好贴心呀﹗

话时话，以手机写字嚟讲，汪阿姐手字真系好靓，仲再次成功带领新潮流﹗见到陆浩明星期日晚台庆彩排时，上载嘅大合照中，都学阿姐咁手写TAG人，跟得好贴呀下，大家要好好学习啦。