朱千雪女神Look现身马场　男友甚少支持戏剧作品唔通怕睇佢咀咀？

撰文： 洪晓璇
出版：更新：

好快就到TVB台庆嘅日子，当晚全台艺人都会盛装出席，颁奖典礼上争妍斗丽兼争奖。不过今年朱千雪（Tracy）完全无戏剧作品播出，台庆夜可以轻松现身志在参与。呢日佢以全白高贵女神造型现身马场出席活动：“英国每逢大型赛马活动，大家都钟意跟传统盛装出席，尤其女士们更会悉心打扮。所以我拣选一条白色长裙，配上特别设计嘅头饰！刚才嚟嘅时候经过一个商场，市民见到我呢身造型都好惊喜，好似穿越时空一样相当有趣！”

朱千雪以全白造型现身马场，既似女神亦甚有待嫁新娘嘅韵味。

问到入马场的心情，Tracy话:“现场气氛非常热闹，可与过万人一齐为心水马匹打气亦系一件乐事。”原来Tracy同马都曾经结下不解缘，佢曾经为拍摄旅游节目，于澳大利亚学过骑马，森林里面慢慢踱步，可谓初步掌握策骑技巧，并感觉像融入大自然般十分写意，但已经系五年前嘅事啦。佢仲话若果日后拍戏需要骑马，自己相当愿意尝试。

Tracy表示自己都有少许抽奖运，不过多数系安慰奖，大奖永远无佢份。

不过要睇Tracy嘅戏剧作品应该仲有排等，因为佢正在修读法律课程：“我当然都舍不得大家，从小到大自己都是一个普通人，无想过可拥有一班粉丝对我咁好，无论我钟意什么，他们都支持我！未来的事将来再算吧，目前最重要是先专心完成degree课程，因为我是一个不太能够分心的人！”

问到佢到底喜欢做学生定艺人，Tracy话最大分别系做学生唔使化妆，做艺人就要时刻保持最佳状态。庆幸自己两样都可同时做到，可以床上碌起身就返学，又可以扮靓出席活动影靓相！

工作学业不能共存，好在感情方面Tracy同男友已经好有默契，关系相当稳定。佢仲大爆原来男友甚少睇佢所拍嘅剧集，唔通怕睇住女友拍亲热戏接受唔嚟？Tracy笑言：“因为男友已经很了解现实中的我，所以毋须通过电视来加深了解，反而他比较多留意我的访问或其他节目！”

以为另一半肯定系头号粉丝睇晒所有作品，原来Tracy男友就系一个例外啦。