【跳跃生命线】雄姐原来会死？　何广沛、张彦博保持神秘唔肯讲

撇除何广沛呢个污点，无线新剧《跳跃生命线》自开播以来都算口碑不俗，陈荣峻饰演的明叔同吴香伦饰演明婶呢一对，剧情铺足一个星期，上星期终于爆发，睇到最后无命𠮶个竟然系平日无病无痛嘅明婶，唔少观众都大赞编剧铺排得非常之好，亦相信之后会再有人“离去”。

其实如果有留意片头的话，其中一幕系众人以全黑上阵，手执白玫瑰，神情严肃，地点疑似系浩园，而企喺坟前嘅系何广沛。再睇睇剧照，有谭家俊（罗天宇饰）、常朗天（李霖恩饰）、高行仁（韦家雄饰）、陆昊然（郭子豪饰）、麦在田（马德钟饰），甚而连消防及救护学院方Sir（冼灏英饰）亦在场，“雄姐”吕剑雄（张彦博饰）虽然唔见踪影，但由于佢五个家姐都有列席，似乎暗示了雄姐之后会死。
 

其实剧集由雄姐同卓定杰去面试、受训到齐齐被派去长沙湾救护站，都有不少二人同捞同煲的画面，最后变成赚人热泪的“死线”绝对唔奇。到底边个会死呢？求证于郭子豪、何广沛、张彦博同罗天宇时，四人都大卖关子，听到何广沛话自己系：“冲动死”之后，郭子豪同罗天宇就话自己会系“冷静死”，而最大嫌疑的张彦博就话“我系睇住人死，因为救唔到嘛”，“冲动王”何广沛解释话：“其实每集每人都经历过唔同嘅死，被问过好多次，我哋系唔会讲，大家继续睇啦。”