林欣彤为年尾个唱狂减10磅　扮型拍摄海报最终得个乱

林欣彤(Mag）今年先后推出《哪里只得我共你》、《忍》和《重光纪念日》都有唔错嘅反应，而之前佢话年尾将会行嘅音乐会亦已落实以What if为主题，“成日听见唔同嘅人问我，如果林欣彤唔系咁咁咁，可能发展得更加好。但其实我好少咁谂，因为我一直深信，所有曾经作出嘅决定同发生咗嘅事，都必然有佢嘅意义同成就。每一个选择都会有取有舍，每一个经历都会有得有失，一切都系睇自己点睇所经历同选择嘅一切。我感激我经历嘅一切，因为咁先有依家嘅我。”
 

话晒今次都系入行8年首个售票音乐会，Mag早在半年前已开始积极备战，除了注意饮食少吃煎炸食物，更积极做运动，包括瑜珈、跑步及游水，成功减掉十磅之后，Mag日前以22吋纤腰拍摄演唱会海报，“熟悉我嘅朋友同钟意我嘅人，都唔难发现我系粉红色控，无论袋、化妆袋、袜、屋企啲家私啦，好多好多都系粉红色。呢个造型啲相出咗嚟之后，好多朋友都赞话好‘林欣彤’。”

Mag又笑谓团队为了表达出其对音乐的热情，刻意为其打造“Wild乱发Look”，虽然出来的照片“型格十足”，但制作过程却是笑料百出：“因为要好劲嘅风吹过嚟先营造到𠮶种Wild嘅效果，所以我𠮶日食风食咗足足八个钟，唔单止影到头痛。又因为啲风力好难控制，好多相都净系见到一堆乱发，又或者啲五官走晒样咁，啲工作人员已经keep起好多核突相话要用嚟威胁我，好搞笑。”