【台风山竹】孖黎瑞恩上山锯树开路　钟健威：自己香港自己救

台风山竹虽然已经远离香港，但10号风球时，蹂躏本港多处地方嘅后遗仍然历历在目。多区仍有塌树令交通大受影响，网上疯传一张警员喺缺乏工具下，以简陋手锯清理塌树嘅照片，而黎瑞恩就即刻去购入电锯，叫埋同门师弟钟健威，坐言起行到马鞍山及锦田帮村民清理大大小小倒塌树木，为居民打通道路。

黎瑞恩寻日留言话：“我要去做得州电锯狂魔喇！”仲上载一张有2把电锯嘅相，电锯非常新净，原来系佢刚刚购入，叫埋同门师弟钟健威（Ray）坐言起行，先去马鞍山，再去锦田帮居民清理山路。Ray留言话：“我地一行三人两把电锯同安全帽，上马鞍山村沿路帮手清理山路什树，一去到就见到要帮手既情境，唯一既上下山通路俾好几大棵树堵塞住，有任何救援需要的话都到不到，我地就同几个村民边锯边搬，2个几钟清开左条路！安全落返山喇。香港被吹至遍体鳞伤，我地就合力执返靓佢！”加上Hashtag“自己香港自己救”，村民都相当感谢佢地出手帮忙，送上新鲜跌落嚟嘅青木瓜作答谢礼物。